labo pe narm tabassum rachaa ke dhul jaaye
Khudaa kare mere aasuu kisii ke kaam aaye

jo ibtadaa-e-safar me diye bujhaa baithe
vo badnasiib kisii kaa suraag kyaa paaye

talaash-e-husn kahaa le chalii Khudaa jaane
umang thii ki faqat zindagii ko apanaaye

bulaa rahe hai ufaq par jo zard-ruu Tiile
kaho to hum bhii fasaane ke raaz ho jaaye

na kar Khudaa ke liye baar-baar zikr-e-bahisht
hum aasmaa kaa mukarrar fareb kyo khaaye

tamaam maikadaa sunsaan maigusaar udaas
labo ko khol kar kuchh sochatii hai miinaaye

shaam ko subah-e-chaman yaad aaii
kiskii Khushbuu-e-badan yaad aaii

jab Khayaalo me koii mod aayaa
tere gesuu kii shikan yaad aaii

yaad aaye tere paikar ke Khutuut
apanii kotaahii-e-fan yaad aaii

chaad jab duur ufaq par Duubaa
tere lahaje kii thakan yaad aaii

din shuaao se ulajhate guzaraa
raat aaii to kiran yaad aaii

mujhe kal meraa ek saathii milaa
jis ne ye raaz kholaa ke
'ab jazbaa-o-shauq kii vahashato ke zamaane gaye'

phir vo aahistaa-aahistaa chaaro taraf dekhataa
mujhse kahane lagaa

'ab bisaat-e-muhabbat lapeto
jahaa se bhii mil jaaye daulat - sameto
Garz kuchh to tahaziib siikho'