ye tabiyat hai to Khud aazaar ban jaayenge hum
chaaraagar royenge aur Gam Khvaar ban jaayenge hum
hum sar-e-chaak-e-vafaa hai aur teraa dast-e-hunar
jo banaa degaa humein ai yaar ban jaayenge hum
kyaa Khabar thii ai nigaar-e-sher tere ishq me
dil baraan-e-shahar ke dil daar ban jaayenge hum
sakht jaan hai par humaarii ustavaarii par na jaa
aise Tuutenge teraa iqaraar ban jaayenge hum
aur kuchh din baithane do kuu-e-jaanaa me humein
raftaa raftaa saayaa-e-diivaar ban jaayenge hum
is qadar aasaan na hogii har kisii se dostii
aashnaaii mein teraa mayaar ban jaayenge hum
miir-o-Gaalib kyaa ke ban paaye nahii faiz-o-firaaq
zam ye thaa ruumii-o-ataar ban jaayenge hum
dekhane me shaakh-e-gul lagate hai lekin dekhanaa
dast-e-gul chiin ke liye talvaar ban jaayenge hum
hum chiraagon ko to taariikii se ladanaa hai 'Faraz'
gul hue par subah ke aasaar ban jaayenge hum. |
ye kyaa ke sab se bayaan dil kii haalaten karanii
'Faraz' tujhko na aaii muhabbate karanii
ye qurb kyaa hai ke tuu saamane hai aur hame
shumaar abhii se judaaii kii sa'ate karanii
koii Khudaa ho ke patthar jise bhii hum chaahe
tamaam umr usii kii ibaadate karanii
sab apane apane qariine se muntazir uske
kisiko shukr kisii ko shikaayate karanii
hum apane dil se hai majabuur aur logon ko
zaraa sii baat pe barpaa qayaamate karanii
mile jab unse to mubaham sii guftaguu karanaa
phir apane aap se sau-sau vazaahate karanii
ye log kaise magar dushmanii nibhaate hai
humein ko raas na aaii muhabbate karanii
kabhii 'Faraz' naye mausamo me ro denaa
kabhii talaash puraanii raqaabate karanii. |
zakhm ko phuul to sar sar ko sabaa kahate hai
jaane kyaa daur hai kyaa log hai kyaa kahate hai
kyaa qayaamat hai ke jin ke liye ruk ruk ke chale
ab vahii log humein aabalaapaa kahate hai
koii batalaao ke ik umr kaa bichhadaa mahabuub
ittefaaqan kahii mil jaaye to kyaa kahate hai
ye bhii andaaz-e-sukhan hai ke jafaa ko terii
Gamzaa-o-ishvaa-o-andaaz-o-adaa kahate hai
jab talak duur hai tuu terii parastish kar le
hum jise chhuu na sake us ko Khudaa kahate hai
kyaa ta'ajjub hai ke hum ahl-e-tamannaa ko 'Faraaz'
vo jo maharuum-e-tamannaa hai buraa kahate hai |
