نئی دہلی : آئل مارکیٹنگ کمپنیوں یعنی تیل کمپنیوں نے ایک بار پھر کمرشل ایل پی جی گیس سلنڈر کی قیمتوں میں تبدیلی کی ہے۔ اس بار 19 کلو کے کمرشل سلنڈر کی قیمت میں 24 روپے کی کمی کی گئی ہے۔ یہ نئی قیمتیں یکم جون 2025 سے ملک بھر میں لاگو ہوں گی۔دہلی میں اب 19 کلو کا کمرشل ایل پی جی سلنڈر 1723.50 روپے میں دستیاب ہوگا، جب کہ پہلے اس کی قیمت 1747.50 روپے تھی۔ اس کمی سے ہوٹلوں، ریستورانوں، ڈھابوں اور دیگر تجارتی اداروں کو کچھ ریلیف مل سکتا ہے، جو کمرشل گیس سلنڈر بڑی مقدار میں استعمال کرتے ہیں۔
تاہم اس بار گھریلو ایل پی جی سلنڈر کی قیمت میں کوئی تبدیلی نہیں کی گئی ہے۔ 14.2 کلو گھریلو ایل پی جی سلنڈر اپنی پرانی قیمت پر دستیاب رہے گا۔واضح رہے کہ تیل کمپنیاں ہر مہینے کی پہلی تاریخ کو ایل پی جی سلنڈر کی قیمتوں کا جائزہ لیتی ہیں اور بین الاقوامی سطح پر خام تیل کی قیمتوں، روپے کی پوزیشن اور مارکیٹ کے دیگر حالات کی بنیاد پر اپنے نرخ تبدیل کرتی ہیں۔
مئی 2024 میں کمرشل گیس سلنڈروں کی قیمتوں میں بھی کمی کی گئی تھی۔ لگاتار دو مہینوں میں ہونے والی اس کمی کو مارکیٹ کے لیے خاص طور پر ریستوراں اور فوڈ انڈسٹری جیسے شعبوں کے لیے راحت سمجھا جاتا ہے۔ جہاں آئل مارکیٹنگ کمپنیوں نے 14 کلو گھریلو گیس سلنڈر کی قیمتوں میں کوئی تبدیلی نہیں کی وہیں 19 کلو کمرشل ایل پی جی سلنڈر کی قیمتوں میں 17 روپے فی سلنڈر تک کمی کی گئی۔
