عام طور پر مئی کا مہینہ شدید گرمی اور لو کے تھپیڑوں سے لوگوں کو پریشان کرتا ہے لیکن اس سال موسم کا مزاج لوگوں کے لیے راحت کی بارش لے کر آیا ہے۔ شمالی ہندوستان کے کئی حصوں میں مغربی اضطراب کی وجہ سے بارش اور ٹھنڈی ہواؤں سے موسم خوشنما بنا ہوا ہے۔ دہلی-این سی آر میں منگل کے روز تیز ہواؤں، ہلکی سے درمیانی بارش اور طوفان کا دور جاری رہا۔ منگل کو محمکمہ موسمیات نے دہلی، اترپردیش، بہار، مدھیہ پردیش سمیت 14 صوبوں میں بارش اور آندھی-طوفان کا الرٹ جاری کیا تھا۔
بدلے ہوئے موسم میں منگل کو راجدھانی کا زیادہ سے زیادہ درجہ حرارت 33.6 ڈگری سیلسیس رہا۔ گزشتہ 24 گھنٹوں کے دوران دہلی میں زیادہ سے زیادہ درجہ حرارت میں 2-1 ڈگری سیلسیس اور کم سے کم درجہ حرارت میں 3-1 ڈگری سیلسیس کا اضافہ ہوا ہے۔ اس کے علاوہ گزشتہ 24 گھنٹوں کے دوران مشرقی-جنوبی-شمالی ہوائیں چلیں جن کی رفتار 15-10 کلومیٹر فی گھنٹہ تھی اور یہ بڑھ کر 37 کلو میٹر فی گھنٹہ تک پہنچ گئی تھیں۔
ہندوستان کے محکمہ موسمیات (آئی ایم ڈی) کے مطابق دہلی-این سی آر کا درجہ حرارت آج (بدھ، 6 مئی) 20 سے 22 ڈگری سیلسیس کے درمیان اور زیادہ سے زیادہ درجہ حرارت 34 سے 36 ڈگری سیلسیس رہنے کا امکان ہے۔ اس دوران آسمان میں بادل چھائے رہیں گے۔ دوپہر یا شام تک ہلکی بارش متوقع ہے۔ ساتھ ہی گرج، بجلی چمکنے اور تیز ہوائیں چلنے کا بھی امکان ہے۔ اس دوران ہوا کی رفتار 20-15 کلو میٹر فی گھنٹہ رہنے کا اندازہ ہے اور جھونکوں کے ساتھ ہوا کی رفتار بڑھ سکتی ہے۔
