اٹلی کی وزیر اعظم جارجیا میلونی نے جنگ آزادی کے بعد کی تاریخ میں ایک بڑا ریکارڈ اپنے نام کر لیا ہے۔ 4 ستمبر 2026 کو ان کی حکومت نے مسلسل 1,413 دن مکمل کر لیے۔ اس کے ساتھ ہی میلونی اٹلی کی جنگ کے بعد تاریخ میں سب سے طویل عرصہ تک مسلسل عہدے پر رہنے والی وزیر اعظم بن گئی ہیں۔ ہندوستانی وزیر اعظم نریندر مودی نے اس کامیابی کے لیے سوشل میڈیا پلیٹ فارم ’ایکس‘ پر اپنی دوست اور اٹلی کی وزیر اعظم جارجیا میلونی کو مبارکباد پیش کی ہے۔
پی ایم مودی نے اپنی سوشل میڈیا پوسٹ میں لکھا ہے کہ ’’اٹلی کی جنگ کے بعد کی تاریخ میں مسلسل سب سے طویل عرصہ تک وزیر اعظم کے عہدے پر رہنے والی وزیر اعظم بننے پر میری دوست پی ایم میلونی کو مبارکباد۔ یہ سنگ میل اطالوی عوام کے ان کی قیادت پر اعتماد اور بھروسے کی عکاسی کرتا ہے۔‘‘ وہ مزید لکھتے ہیں کہ ’’ان کی (میلونی کی) دوستی نے ہندوستان-اٹلی خصوصی اسٹریٹجک شراکت داری کو مضبوط بنانے میں بھی اہم کردار ادا کیا ہے اور میں دونوں ممالک کی عوام کے لیے ایک خوشحال مستقبل کی تعمیر کے لیے قریبی تعاون جاری رکھنے کا منتظر ہوں۔‘‘ پوسٹ کے آخر میں انھوں نے آنے والے برسوں میں میلونی کی مسلسل کامیابی کے لیے نیک خواہشات بھی پیش کی ہیں۔
قابل ذکر ہے کہ میلونی نے سابق وزیر اعظم سلویو برلسکونی کے ریکارڈ کو پیچھے چھوڑا ہے۔ برلسکونی کی دوسری حکومت 2001 سے 2005 کے درمیان مسلسل 1,412 دن تک اقتدار میں رہی تھی۔ میلونی کی حکومت نے ایک دن زیادہ مکمل کرتے ہوئے یہ ریکارڈ توڑ دیا ہے اور یہ گنتی جاری ہے۔ یعنی میلونی آنے والے دنوں میں اپنے اس ریکارڈ کو مزید استحکام بخشیں گی۔
واضح رہے کہ اٹلی میں دوسری عالمی جنگ کے بعد سیاسی عدم استحکام کی ایک طویل تاریخ رہی ہے۔ تقریباً 80 برسوں میں ملک میں 68 حکومتیں بن چکی ہیں اور ایک کابینہ کی اوسط مدت تقریباً 14 ماہ رہی ہے۔ ایسے میں میلونی کا مسلسل اقتدار میں بنے رہنا سیاسی استحکام کے لحاظ سے اہم سمجھا جا رہا ہے۔
