نئی دہلی: حج بیت اللہ 2026 کی تیاریوں کے سلسلے میں حج کمیٹی آف انڈیا، ریاستی حج کمیٹیوں اور وزارت اقلیتی امور کی جانب سے مختلف سطحوں پر تیاریاں جاری ہیں۔ اسی ضمن میں دہلی اسٹیٹ حج کمیٹی کی چیئرپرسن کوثر جہاں کے مطابق وزیر اعظم نریندر مودی کے ذریعہ خواتین کو اختیارات تفویض کرنے اور انہیں تمام تر شعبہ حیات میں باختیار بنانے کے مرحلہ میں حج کمیٹی آف انڈیا نے حج 2026 کے لیے خواہش مند ایسی خواتین، جنہوں نے بروقت پاسپورٹ نہ ہونے یا کسی دیگر معقول اسباب کی بنا پر حج درخواست جمع نہیں کر سکیں اور ان کے محرم کا انتخاب ہو چکا ہے، ایسی خواتین کو فریضہ حج کی ادائیگی کا موقعہ فراہم کرنے کے لیے محرم کوٹہ میں مختص 500 سیٹوں کے لیے درخواستیں مطلوب ہیں۔ ایسی تمام خواتین حج پالیسی 2026 کی روشنی میں 16 اکتوبر سے 31 اکتوبر تک حج کمیٹی آف انڈیا کی ویب سائٹ ’حج کمیٹی ڈاٹ جی او وی ڈاٹ ان‘ پر آن لائن حج درخواستیں جمع کرا سکتی ہیں۔
واضح ہو کہ محرم زمرے میں حج درخواست جمع کرنے کے لیے ضروری ہے کہ درخواست گزار خاتون نے پہلے حج کمیٹی یا پرائیویٹ گروپ یا کسی اور طرح سے حج نہ کیا ہو۔ درخواست گزار خاتون کے پاس درخواست دینے کے لیے مقرر آخری تاریخ کو یا اس کے پہلے جاری کیا ہوا اور کم سے کم 31 دسمبر 2026 تک قابل قبول انڈین پاسپورٹ ہونا لازمی ہے۔ درخواستیں صرف آن لائن ہی قبول کی جائیں گی اور دستی، تحریری یا کسی اور ذریعہ سے قبول نہیں ہوں گی۔ درخواست گزارکو اپنے پاسپورٹ کے پہلے اور دوسرے صفحات کی صاف کاپی، ایک تازہ کھینچا ہوا پاسپورٹ سائز کا فوٹو، اپنے رہائشی پتہ کا قابل قبول ثبوت اور اپنے محرم مرد عازم حج سے رشتہ کا قابل قبول دستاویز بھی اپلوڈ کرنا لازمی ہے۔ اگر کسی کور میں پہلے سے ہی 5 عازمین شامل ہیں تو ایسی صورت میں اس کور میں درخواستیں قبول نہیں کی جائیں گی۔ اس زمرے میں ایسی خواتین بھی درخواست نہیں دے سکتی ہیں جن کا انتخاب حج 2026 کے لیے پہلے ہی کسی کور میں ہو چکا ہے۔ اس زمرے میں درخواست گزار عازمین کی تعدا اگر 500 سے زیادہ ہوتی ہے تو امیدوار وں کا انتخاب آن لائن قرعہ اندازی کے ذریعے کیا جائے گا۔
دہلی حج کمیٹی کے ایگزیکٹیو آفیسر اشفاق عارفی کے مطابق حج 2026 کے لیے پہلے مرحلہ میں قرعہ اندازی کے ذریعہ منتخب عازمین اور پہلی ویٹینگ لسٹ میں منتخب عازمین جنہوں نے حج اخراجات کی پہلی قسط جمع کرا دی ہے انہیں 31 اکتوبر 2025 تک حج اخراجات کی دوسری قسط 125000 روپے فی کس جمع کرانا لازمی ہے، جبکہ دوسری ویٹینگ لسٹ میں منتخب عازمین اور پہلی ویٹینگ لسٹ کے ایسے عازمین جنہوں نے اب تک پہلی قسط جمع نہیں کرائی ہے، انہیں بھی خصوصی رعایت کے تحت 277300 روپے فی کس رقم 31 اکتوبر تک جمع کرانا لازمی ہے۔ عازمین حج اخراجات کی رقم حج کمیٹی آف انڈیا کی ویب سائٹ ’حج کمیٹی ڈاٹ جی او وی ڈاٹ ان’‘ پر یا ’حج سویدھا ایپ‘ پر ای پیمینٹ کے توسط سے اپنے کریڈٹ کارڈ یا ڈیبٹ کارڈ کے ذریعہ یا اسٹیٹ بینک آف انڈیا یا یونین بینک آف انڈیا کی کسی بھی برانچ میں پے سلپ میں اپنا بینک ریفرینس نمبر درج کر کے جمع کرا سکتے ہیں۔ پے سلپ اور بینک ریفرینس نمبر حج کمیٹی آف انڈیا کی ویب سائٹ پر اپنے کور نمبر کے حوالہ سے حاصل کر سکتے ہیں۔(پریس ریلیز)
