انل امبانی کی مشکلات میں مسلسل اضافہ ہوتا جا رہا ہے۔ ای ڈی کے بعد اب سی بی آئی نے 17,000 کروڑ روپے کے مبینہ بینک دھوکہ دہی معاملے میں کارروائی تیز کرتے ہوئے انل امبانی اور ان کی کمپنی ریلائنس کمیونکیشنز (آر کام) سے وابستہ کئی مقامات پر چھاپے مارے ہیں۔ سی بی آئی کی ٹیم ہفتہ کی صبح تقریباً 7 بجے انل امبانی کی کف پریڈ سیونڈ میں واقع رہائش گاہ پر پہنچی، جہاں ان کے اہل خانہ بھی موجود تھے۔ تلاشی مہم میں سی بی آئی کے 7 سے 8 افسر شامل تھے۔
ذرائع کے مطابق سی بی آئی کی کارروائی کا مرکز یس بینک اور ریلائنس گروپ کے درمیان مالی لین دین سے متعلق دستاویزات کی جانچ ہے۔ ایجنسی قرض کی رقم کے غلط استعمال اور بینکوں سے فراڈ کے ممکنہ شواہد جمع کرنے کی کوشش کر رہی ہے۔ سی بی آئی نے ریلائنس کمیونکیشنز کے خلاف باقاعدہ ایف آئی آر درج کر لی ہے، جس میں اسٹیٹ بینک آف انڈیا کو 2 ہزار کروڑ روپے سے زیادہ کا نقصان پہنچنے کا ذکر کیا گیا ہے۔
قابل ذکر ہے کہ انفورسمنٹ ڈائریکٹوریٹ (ای ڈی) نے بھی یکم اگست کو انل امبانی کو اسی فراڈ کیس میں پوچھ گچھ کے لیے طلب کیا تھا۔
دوسری جانب مالیاتی منڈی میں بھی اس کارروائی کے اثرات دیکھے جا رہے ہیں۔ انل امبانی کی کمپنیوں کے شیئر دباؤ میں ہیں۔ ریلائنس انفراسٹرکچر اور ریلائنس پاور کے شیئرز میں ایک مہینے کے دوران 22 فیصد سے زیادہ کی گراوٹ ریکارڈ کی گئی ہے۔ حالانکہ، ریلائنس انفراسٹرکچر کو حال ہی میں نورتن کمپنی NHPC سے بڑا آرڈر ملا ہے، اور ریلائنس پاور کی ایک معاون کمپنی نے بھوٹان میں جوائنٹ وینچر قائم کیا ہے۔
read more……qaumiawaz.com
