نئی دہلی: دہلی کانگریس کے سینئر ترجمان ڈاکٹر نریش کمار نے بی جے پی لیڈر اور دہلی کابینہ کے وزیر آشیش سود کے ایک حالیہ بیان پر شدید ردِعمل ظاہر کرتے ہوئے کہا ہے کہ یہ بیان بی جے پی کی غریب اور جھگیوں میں رہنے والے لوگوں کے تئیں منفی ذہنیت کو بے نقاب کرتا ہے۔ انہوں نے مطالبہ کیا کہ وزیر آشیش سود اس بیان پر کھلے عام، غیر مشروط اور واضح عوامی معافی مانگیں۔
ڈاکٹر نریش کمار نے کہا کہ وزیر کا یہ کہنا کہ بعض اپوزیشن رہنما کبھی جھگیوں میں رہتے تھے اور آج خود کو قومی ترجمان یا سینئر لیڈر کہتے ہیں، نہ صرف توہین آمیز ہے بلکہ عوام دشمن سوچ کی عکاسی بھی کرتا ہے۔ ان کے مطابق، محض یہ کہنا کہ ’میرے بیان کو توڑ مروڑ کر پیش کیا گیا‘ کسی طور قابل قبول نہیں، کیونکہ اصل مسئلہ بیان کی نیت اور سوچ کا ہے۔
انہوں نے کہا کہ اس طرح کے بیانات سے یہ واضح ہوتا ہے کہ بی جے پی کے بعض رہنما اقتدار کے نشے میں عوام سے کٹ جاتے ہیں اور یہ بھول جاتے ہیں کہ جمہوریت میں اصل طاقت عوام کے پاس ہوتی ہے۔ ڈاکٹر نریش کمار نے کہا کہ جھگیوں میں رہنے والے شہری دہلی کی معیشت، تعمیرات، صفائی اور خدمات کے شعبوں کی ریڑھ کی ہڈی ہیں اور ان کی تضحیک دراصل دہلی کے محنت کش طبقے کی توہین ہے۔
