نئی دہلی : شمال مشرقی دہلی میں 2020 کے فسادات کی مبینہ بڑی سازش سے متعلق کیس میں زیرِ حراست شرجیل امام کو دہلی کی ایک عدالت سے 7 روز کی عبوری ضمانت ملنے کے بعد اتوار کو تہاڑ جیل سے رہا کر دیا گیا۔ عبوری ضمانت 4 اکتوبر سے 10 اکتوبر 2026 تک مؤثر رہے گی۔کڑکڑڈوما عدالت نے شرجیل امام کو دہلی اور بہار میں ہونے والی اپنے دو رشتہ داروں کی شادیوں میں شرکت کیلئے عارضی راحت دی ہے۔ عدالت نے انہیں ضمانت کی مدت ختم ہونے پر 10 اکتوبر کی شام جیل حکام کے سامنے خودسپردگی کی ہدایت دی ہے۔شرجیل امام پر شمال مشرقی دہلی میں فروری 2020 کے تشدد سے متعلق کیس میں غیر قانونی سرگرمیاں (روک تھام) ایکٹ (یو اے پی اے) سمیت دیگر دفعات کے تحت مقدمہ چل رہا ہے۔ انہیں جنوری 2020 میں گرفتار کیا گیا تھا اور مقدمے کی کارروائی کے دوران وہ مسلسل زیرِ حراست رہے ہیں۔
