ہندوستان کے لیے ایک خوشخبری سامنے آئی ہے، جہاں مختلف مقامات پر سونے کے ذخائر کی موجودگی کا انکشاف ہوا ہے۔ میڈیا رپورٹس کے مطابق، اوڈیشہ کے کئی اضلاع میں تقریباً 20 میٹرک ٹن سونے کے ریزرو ملنے کا امکان ظاہر کیا جا رہا ہے۔ یہ دریافت جیولوجیکل سروے آف انڈیا (جی ایس آئی) کی حالیہ کھوج کا نتیجہ ہے، جس کے بعد محکمہ کانکنی اور ریاستی حکومت سرگرم ہو گئی ہے۔
اب تک جس اضلاع میں سونے کی موجودگی کی تصدیق ہوئی ہے ان میں دیوگڑھ، سندرگڑھ، نورنگ پور، کے اونھار، انگل اور کورا پٹ شامل ہیں۔ اس کے علاوہ میور بھنج، ملکان گیری، سنبھل پور اور بودھ میں بھی تلاش جاری ہے۔ اگرچہ سرکاری اعداد و شمار سامنے نہیں آئے، مگر ابتدائی اندازوں کے مطابق ذخیرہ 10 سے 20 میٹرک ٹن کے درمیان ہو سکتا ہے۔
یہ مقدار اگرچہ ملک کی کل درآمدات کے مقابلے میں کم ہے، لیکن گھریلو سطح پر سونے کی پیداوار میں اضافہ کرنے کے لحاظ سے یہ ایک بڑا قدم مانا جا رہا ہے۔ اوڈیشہ حکومت، اوڈیشہ مائننگ کارپوریشن (او ایم سی) اور جی ایس آئی مل کر اس دریافت کو کاروباری سطح تک پہنچانے کی تیاری کر رہے ہیں۔ دیوگڑھ ضلع میں پہلا گولڈ مائننگ بلاک نیلامی کے لیے تیار کیا جا رہا ہے، جہاں جی-3 سے جی-2 سطح تک ڈرلنگ اور سیمپلنگ کا کام جاری ہے۔
اگر یہ سونا عملی طور پر نکالا گیا تو نہ صرف مقامی معیشت کو تقویت ملے گی بلکہ روزگار، انفراسٹرکچر اور خدمات کے شعبے میں بھی ترقی ممکن ہو گی۔ اوڈیشہ، جو پہلے ہی کرومائٹ، باکسائٹ اور لوہے کی دولت سے مالا مال ہے، اب سونے کے ہب کے طور پر بھی ابھر سکتا ہے۔
read more……qaumiawaz.com
