نئی دہلی، ۲۱ اگست ۲۰۲۵ – عام آدمی پارٹی کے راجیہ سبھا رکن راگھو چڈھا نے پارلیمنٹ میں مرکزی حکومت سے مطالبہ کیا ہے کہ ملک کے ہر شہری کو جدید جنریٹیو آرٹیفیشل انٹیلی جنس (اے آئی) ٹولز کا مفت سبسکرپشن دیا جائے۔ ان کا کہنا تھا کہ چیٹ جی پی ٹی، جیمینی، کلاؤڈ اور دیگر ٹیکنالوجی پلیٹ فارمز تک عام لوگوں کی رسائی ضروری ہے تاکہ بھارت دنیا کی تیزی سے بدلتی ٹیکنالوجی دوڑ میں پیچھے نہ رہ جائے۔
راگھو چڈھا کا کہنا تھا کہ اے آئی صرف ایک ٹیکنالوجی نہیں بلکہ ایک موقع ہے، جو ہر بھارتی کو ترقی کی نئی راہوں پر گامزن کر سکتا ہے۔ انہوں نے کہا کہ چاہے تعلیم ہو یا زراعت، کاروبار ہو یا گھریلو زندگی، اے آئی ہر میدان میں سہولت، بچت اور ترقی کا ذریعہ بن سکتا ہے۔
انہوں نے بتایا کہ یو اے ای، سنگاپور اور چین جیسے ممالک اپنے شہریوں کو جدید اے آئی ٹولز مفت فراہم کر رہے ہیں، جس سے ان کی قومی پیداوار اور عالمی مسابقت میں نمایاں اضافہ ہوا ہے۔ چڈھا نے زور دیا کہ بھارت کو بھی اسی راہ پر چلنا ہوگا تاکہ عالمی ٹیکنالوجی میدان میں ایک مضبوط مقام حاصل کیا جا سکے۔
ان کا کہنا تھا کہ کسان جدید زرعی معلومات، موسم کی پیش گوئی اور بہتر حکمت عملی سے فائدہ اٹھا سکتے ہیں، طلبہ تحقیق و تیاری میں بہتری لا سکتے ہیں اور کاروباری طبقہ اپنے نظام کو زیادہ مؤثر بنا سکتا ہے۔
راگھو چڈھا نے حکومت سے اپیل کی کہ ’ڈیجیٹل انڈیا‘ مہم کو کامیاب بنانے کے لیے ہر شہری کو فوری طور پر مفت اے آئی ٹولز کی سہولت فراہم کی جائے۔
reed more…..qaumiawaz.com
