بنگلورو، کرناٹک کانگریس لیجسلیچر پارٹی کے نئے قائد منتخب ہونے والے ڈی کے شیوکمار 3 جون کو ریاست کے نئے چیف منسٹر کے طور پر حلف لیں گے ۔آج کانگریس مقننہ پارٹی رہنما منتخب ہونے کے بعد شیوکمار نے راج بھون پہنچ کر گورنر تھاور چند گہلوٹ سے ملاقات کی اور حکومت تشکیل دینے کا باضابطہ دعویٰ پیش کیا۔ اس موقع پر سبکدوش چیف منسٹر سدارمیا اور کانگریس کے دیگر سینئر رہنما بھی موجود تھے ۔گورنر نے شیوکمار کا دعویٰ قبول کرکے انہیں حکومت بنانے کی دعوت دی۔ راج بھون سے جاری اطلاعات کے مطابق وہ 3 جون کو شام 4 سے 5 بجے کے درمیان چیف منسٹر کا حلف اٹھائیں گے ۔
اس سے قبل ودھان سودھا میں منعقدہ کانگریس مقننہ پارٹی اجلاس میں ڈی کے شیوکمار کو متفقہ طور پر قائد منتخب کیا گیا۔ ان کے نام کی تجویز سابق چیف منسٹر سدارمیا نے پیش کی، جس کی تمام اراکینِ اسمبلی نے بیک آواز حمایت کی۔کانگریس قیادت کی جانب سے یہ فیصلہ ریاست میں اقتدار کی منتقلی کے عمل کا اہم مرحلہ تصور کیا جا رہا ہے ۔ پارٹی نے اس انتخاب کو اتحاد اور داخلی ہم آہنگی کی علامت قرار دیا ہے ۔واضح رہے کہ سدارامیا نے جمعرات کو چیف منسٹر عہدے سے استعفیٰ دے دیا تھا، جس کے بعد نئے قائد کے انتخاب اور نئی حکومت کی تشکیل کا عمل شروع ہوا۔ شیوکمار کے حلف برداری کے ساتھ ہی کرناٹک میں کانگریس حکومت ایک نئے دور میں داخل ہو جائے گی۔
