یونین پبلک سروس کمیشن (یو پی ایس سی) کے حالیہ بھرتی اشتہار کے مطابق دہلی کے سرکاری اسکولوں میں پرنسپل اور وائس پرنسپل کے 828 عہدے خالی ہیں۔ ڈائریکٹوریٹ آف ایجوکیشن (ڈی او ای) دہلی میں تقریباً 1090 سرکاری اسکول چلاتی ہے۔ جمعہ (7 اگست) کو ڈی او ای کے ذریعہ جاری کردہ ایک سرکلر کے مطابق سرکاری اسکولوں میں پرنسپل کے لیے 124 اور وائس پرنسپل کے لیے 704 عہدے خالی ہیں، جس میں براہ راست بھرتی کے ذریعہ بھرے جانے والے مجموعی عہدوں کی تعداد 828 ہو گئی ہے۔
سرکلر میں کہا گیا ہے کہ دہلی حکومت میں 124 پرنسپل اور 704 وائس پرنسپل کی براہ راست بھرتی کے لیے 25 جولائی سے 14 اگست تک درخواست طلب کیے گئے تھے۔ دہلی کے سرکاری اسکولوں میں پرنسپل کے 950 اور وائس پرنسپل کے 1670 عہدے منظور شدہ ہیں۔ ان میں سے 50 فیصد عہدے یو پی ایس سی کے ذریعہ براہ راست بھرتی اور 50 فیصد عہدے پرموشن سے بھرے جانے ہیں۔
واضح رہے کہ براہ راست بھرتی کے لیے مقررہ 475 پرنسپل کے عہدوں میں سے 124 عہدے خالی ہیں۔ پرموشن کوٹے میں تقریباً 250 پرنسپل عہدے بھرے ہوئے ہیں، جبکہ تقریباً 225 عہدے خالی ہیں۔ وائس پرنسپل کے 835 عہدے براہ راست بھرتی کے لیے مقرر ہیں، جن میں سے 704 عہدے خالی ہیں۔ پرموشن کوٹے کے تحت تقریباً 400 عہدوں پر ایڈ-ہاک وائس پرنسپل کام کر رہے ہیں۔ وائس پرنسپل کے پرموشن کوٹے میں تقریباً 435 عہدے اب بھی خالی ہیں۔ ایسوسی ایشن کے مطابق دونوں زمروں میں بڑی تعداد میں عہدے خالی ہونے کے سبب اسکولوں کے انتظامی کام متاثر ہو سکتے ہیں۔
