نئی دہلی: آل انڈیا میڈیکل اسٹوڈنٹس ایسوسی ایشن نے وزیر اعظم نریندر مودی کو ایک مکتوب ارسال کرتے ہوئے ایران کی موجودہ کشیدہ صورتحال کے پیش نظر وہاں زیر تعلیم ہندوستانی طلبہ کے امتحانات ملتوی کرانے کی اپیل کی ہے۔ تنظیم نے اپنے خط میں کہا ہے کہ طلبہ کی جان و مال کا تحفظ اولین ترجیح ہونی چاہیے اور موجودہ حالات میں امتحانات کا انعقاد نہ تو محفوظ ہے اور نہ ہی عملی طور پر ممکن دکھائی دیتا ہے۔
ایسوسی ایشن کے مطابق تہران میں ہندوستانی سفارت خانے نے 23 فروری 2026 کو ایک ہنگامی مشورہ جاری کیا ہے، جس میں ایران میں موجود تمام ہندوستانی شہریوں اور طلبہ کو فوری طور پر ملک چھوڑنے کی ہدایت دی گئی ہے۔ سفارت خانے نے یہ قدم ایران میں بدلتی ہوئی سکیورٹی صورتحال کے پیش نظر اٹھایا ہے۔ خط میں کہا گیا ہے کہ اگرچہ یہ مشورہ شہریوں کی سلامتی کے لیے بے حد اہم ہے، تاہم متعدد ہندوستانی طلبہ کے امتحانات 5 مارچ 2026 کو مقرر ہیں، جس کے باعث وہ فوری طور پر وطن واپس آنے سے قاصر ہیں۔
تنظیم نے اپنے مکتوب میں واضح کیا کہ موجودہ تناؤ بھرے ماحول میں صرف امتحان دینے کے لیے ایران میں قیام کرنا طلبہ کے لیے خطرناک ہو سکتا ہے۔ اس صورتحال نے نہ صرف طلبہ بلکہ ان کے اہل خانہ کو بھی شدید ذہنی دباؤ میں مبتلا کر دیا ہے۔ غیر یقینی حالات اور امتحانات کے حوالے سے ابہام نے تعلیمی عمل کو متاثر کیا ہے اور طلبہ کے مستقبل کے بارے میں خدشات پیدا کر دیے ہیں۔
آل انڈیا میڈیکل اسٹوڈنٹس ایسوسی ایشن نے وزیر اعظم سے مطالبہ کیا ہے کہ ہندوستانی سفارت خانہ اور متعلقہ حکام کو ہدایت دی جائے کہ وہ ایرانی جامعات اور متعلقہ تعلیمی اداروں کے ساتھ فوری رابطہ قائم کریں اور طے شدہ امتحانات کو مؤخر کرانے کے لیے اقدامات کریں۔ تنظیم نے یہ بھی کہا ہے کہ حکومت کو چاہیے کہ ہندوستانی طلبہ کی محفوظ واپسی اور ان کے انخلا کے عمل کو جلد از جلد یقینی بنایا جائے تاکہ کوئی طالب علم غیر ضروری خطرے کا سامنا نہ کرے۔
