امریکہ کے سب سے بڑے شہر نیویارک سٹی کے میئرظہران ممدانی کی جانب سے تارکین وطن کے حوالے سے دیا گیا بیان سرخیوں میں آگیا ہے۔ نقل مکانی اور معاشرے میں مذہب کے کردار پر بات کرتے ہوئے انہوں نے اسلامی تاریخ کا حوالہ دیا اور کہا کہ امریکہ کو تارکین وطن کے بارے میں اپنے رویے پر غور کرتے وقت اسلام سے درس لینا چاہیے۔
میئر ممدانی نے کہا کہ اسلام کی بنیاد میں ہجرت کا ایک اہم واقعہ شامل ہے۔ حضرت محمدؐ کی ہجرت کی مثال دیتے ہوئے انہوں نے بتایا کہ کس طرح مکہ سے مدینہ تک کا سفرتاریخ اسلام کا اہم حصہ ہے۔ ممدانی کے مطابق اس واقعہ سے پتہ چلتا ہے کہ حضرت محمدؐ بھی ایک زمانے میں اجنبی تھے اور انہوں نے پناہ حاصل کی تھی۔ انہوں نے اس تناظر کو سماج میں مہمان نوازی اور معاشرے میں ضرورت مندوں کو پناہ دینے کے جذبے سے جوڑا۔
میئر ظہران ممدانی نے اس تاریخی تناظر کو نقل مکانی کی پالیسی پر براہ راست مذہبی دلیل دینے کی بجائے ایک اخلاقی تناظر کے طور پر پیش کیا۔ انہوں نے دلیل دی کہ مشکل حالات سے بھاگنے والے لوگوں کے تئیں حساسیت اور ہمدردی کا انداز اپنانا ضروری ہے۔ میئر ممدانی کے اس بیان پر سوشل میڈیا اور سیاسی حلقوں میں شدید ردعمل سامنے آیا۔ کچھ لوگوں نے اسے ہمدردی اور انسانی اقدار پر مبنی اپیل بتاتے ہوئے حمایت کی۔ وہیں کچھ صارفین نےسوال اٹھایا کہ عوامی پالیسی کے مباحثوں میں مذہبی شخصیات کا ذکر کتنا مناسب ہے۔
اعلیٰ تعلیم یافتہ اورماہرین سیاست میں شمارکئے جانے والے نیویارک کے میئرظہران ممدانی پہلے بھی کہہ چکے ہیں کہ ان کا عقیدہ سماجی انصاف اور پالیسی سوچ کو متاثر کرتا ہے۔ ان کے تازہ بیان کو اسی تناظر میں دیکھا جا رہا ہے، جس سے ایک بار پھر امریکہ میں امیگریشن اور شناخت کی سیاست کے بارے میں بحث تیز ہو تی نظر آرہی ہے۔
