ممبئی :/21 جولائی (ایجنسیز)مہاراشٹرا کے ضلع امراوتی میں واقع چندور ریلوے کے آنند مٹھ سے وابستہ مہاراج دتاگیری گرو جے رام جی مہاراج کے خلاف ایک خاتون نے تقریباً دس برس تک جنسی، ذہنی، جسمانی اور مالی استحصال کا الزام عائد کیا ہے۔ متاثرہ خاتون کی شکایت پر چندور ریلوے پولیس نے پوکسو ایکٹ، عصمت دری اور دیگر متعلقہ دفعات کے تحت مقدمہ درج کر لیا ہے، جبکہ ملزم واردات کے بعد سے فرار بتایا جا رہا ہے۔ پولیس کے مطابق متاثرہ خاتون کی پہلی ملاقات 2014 میں ایک مذہبی پروگرام کے دوران ملزم سے ہوئی تھی۔ خاتون کا الزام ہیکہ ملزم نے اس کا اعتماد حاصل کرنے کے بعد اگست 2016 میں اسے آنند مٹھ بلایا، جہاں اس کی مرضی کے خلاف زبردستی جنسی تعلق قائم کیا اور مزاحمت کرنے پر جان سے مارنے کی دھمکیاں دیں۔ شکایت میں کہا گیا ہے کہ 2016 سے 30 مئی 2026 تک ملزم نے شادی اور خوشحال زندگی کا جھانسہ دیکر متعدد مرتبہ اس کا جنسی استحصال کیا۔ خاتون کا یہ بھی الزام ہے کہ اس عرصہ کے دوران اسے ذہنی، جسمانی اور مالی طور پر بھی نشانہ بنایا گیا۔ بعدازاں اس کی شادی ہونے کے باوجود ملزم مسلسل رابطے میں رہا اور اسے اپنے شوہر سے طلاق لینے پر آمادہ کرتا رہا۔ متاثرہ خاتون کے مطابق طلاق کے بعد اسے آنند مٹھ میں بیوی جیسا درجہ دے کر رکھا گیا اور عقیدت مندوں سے چندہ اور رقوم جمع کرنے کی ذمہ داری سونپی گئی۔ اس کا الزام ہیکہ جمع ہونے والی رقم ملزم اپنے ذاتی اخراجات پر خرچ کرتا تھا۔ بعد میں اسے مٹھ سے نکال دیا گیا۔
شکایت کے مطابق 19 جون 2026 کو جب خاتون دوبارہ آنند مٹھ پہنچی تو ملزم نے مبینہ طور پر عقیدت مندوں کے سامنے اس کی توہین کی، اس کے ساتھ بدسلوکی اور مارپیٹ کی، جان سے مارنے کی دھمکی دی اور مٹھ سے نکال دیا۔چندور ریلوے پولیس اسٹیشن کے اسٹیشن ہاؤس آفیسر سریش مسکے نے تصدیق کی ہے کہ متاثرہ خاتون کی شکایت کی بنیاد پر دتاگیری گرو جے رام جی مہاراج کے خلاف پوکسو ایکٹ، عصمت دری اور بھارتیہ نیائے سنہتا (BNS) کی متعلقہ دفعات کے تحت مقدمہ درج کیا گیا ہے۔پولیس کے مطابق مقدمہ درج ہونے کے بعد سے ملزم فرار ہے۔ اس کی گرفتاری کے لیے خصوصی ٹیم تشکیل دی گئی ہے، جو مختلف ممکنہ مقامات پر چھاپے مار رہی ہے۔ پولیس کا کہنا ہے کہ ملزم کو جلد گرفتار کرکے قانون کے مطابق مزید کارروائی عمل میں لائی جائے گی۔
