اسمبلی انتخابات سے قبل بہار کے وزیراعلیٰ نتیش کمار نے خواتین اور نوجوانوں کے لیے دو اہم فیصلوں کا اعلان کیا ہے۔ پہلا فیصلہ خواتین کو تمام سرکاری نوکریوں میں 35 فیصد ریزرویشن دینے کا ہے، جو تمام کیٹیگریز اور محکموں میں نافذ ہوگا۔ دوسرا فیصلہ ’بہار یوتھ کمیشن‘ کے قیام سے متعلق ہے، جس کا مقصد ریاست کے نوجوانوں کو تربیت، روزگار اور خود کفالت کی جانب لے جانا ہے۔
کمیشن میں ایک صدر، دو نائب صدور اور سات اراکین ہوں گے، جن کی عمر 45 سال سے کم ہوگی۔ یہ ادارہ سرکاری پالیسیوں کے لیے تجاویز دے گا، سرکاری محکموں سے کوآرڈینیشن کرے گا اور نوجوانوں کو منشیات سے بچانے کی بیداری مہم بھی چلائے گا۔ ریاستی حکومت ان اقدامات کو فلاحی قدم قرار دے رہی ہے، جبکہ حزبِ اختلاف نے انہیں انتخابی حکمت عملی قرار دیا ہے، جس کا مقصد ووٹرز کو متاثر کرنا ہے۔
