نئی دہلی: دہلی میں بھارتیہ جنتا پارٹی کی حکومت نے منگل کو اسمبلی میں مالی سال 2025-26 کے لیے ایک لاکھ کروڑ روپے کا بجٹ پیش کیا۔ یہ بجٹ گزشتہ سال کے مقابلے میں 31.5 فیصد زیادہ ہے اور بی جے پی حکومت کا دہلی میں 27 سال بعد پہلا بجٹ ہے۔ وزیر اعلیٰ ریکھا گپتا نے بجٹ پیش کرتے ہوئے کہا کہ یہ دہلی کو ایک جدید اور اسمارٹ شہر میں بدلنے کی جانب اہم قدم ہوگا۔ بجٹ میں تعلیم، صحت، ٹرانسپورٹ اور انفراسٹرکچر کے لیے بڑے التزامات کیے گئے ہیں۔
ریکھا گپتا نے اپنی بجٹ تقریر میں کہا کہ اس بجٹ کا مقصد دہلی کی مجموعی ترقی کو رفتار دینا ہے۔ بجٹ میں بنیادی ڈھانچے کی ترقی کے لیے 28,000 کروڑ روپے مختص کیے گئے ہیں، جو سڑکوں، پلوں، نکاسی آب، ٹرانسپورٹ اور دیگر عوامی سہولیات کی بہتری کے لیے خرچ کیے جائیں گے۔ دہلی کے سیور اور پانی کے نظام کو عالمی معیار کا بنانے کے لیے 9,000 کروڑ روپے کا التزام کیا گیا ہے۔ اس کے تحت نئی واٹر پائپ لائن بچھائی جائے گی، سیور لائنوں کو اپ گریڈ کیا جائے گا اور ہر گھر کو صاف پانی کی سہولت دی جائے گی۔
ریکھا گپتا نے کہا کہ دہلی میں یمنا کی صفائی کے لیے 500 کروڑ روپے مختص کیے گئے ہیں۔ اس رقم سے گندے نالوں کو ٹریٹ کیا جائے گا اور پانی کو یمنا میں جانے سے روکا جائے گا۔ حکومت 40 نئے سیور ٹریٹمنٹ پلانٹ بھی بنائے گی، جبکہ موجودہ پلانٹس میں بہتری کے لیے 40 کروڑ روپے کی جدید مشینیں خریدی جائیں گی۔ نجم گڑھ ڈرین کے لیے 200 کروڑ روپے کا التزام کیا گیا ہے اور ہریانہ سے دہلی آنے والی نہر کو پائپ لائن میں تبدیل کرنے پر بھی 200 کروڑ روپے خرچ ہوں گے۔
وزیر اعلیٰ نے خواتین کی فلاح و بہبود کے لیے بھی بڑے اعلانات کیے۔ انہوں نے خواتین سمृی یوجنا کے لیے 5100 کروڑ روپے مختص کرنے کا اعلان کیا، جس کے تحت خواتین کو معاشی مدد دی جائے گی۔ بجٹ میں حاملہ خواتین کے لیے 210 کروڑ روپے مختص کیے گئے ہیں۔ اس کے علاوہ دہلی میں 50,000 نئے سی سی ٹی وی کیمرے لگانے کا اعلان کیا گیا ہے تاکہ خواتین کی سکیورٹی کو مزید مضبوط بنایا جا سکے۔
تعلیم کے شعبے میں بھی حکومت نے بڑے اعلانات کیے ہیں۔ اسکولوں میں بنیادی ڈھانچے کی بہتری کے لیے 350 کروڑ روپے مختص کیے گئے ہیں۔ وزیر اعلیٰ نے کہا کہ دہلی میں 100 مقامات پر اٹل کینٹین کھولی جائیں گی، جہاں عوام کو مناسب نرخ پر کھانا فراہم کیا جائے گا۔ اس کے لیے بجٹ میں 100 کروڑ روپے کا التزام کیا گیا ہے۔
وزیر اعلیٰ نے صنعتوں کے فروغ کے لیے نئی صنعتی پالیسی متعارف کرانے کا اعلان کیا۔ انہوں نے کہا کہ دہلی میں گلوبل انویسٹرس سمٹ منعقد کی جائے گی تاکہ سرمایہ کاری کو فروغ دیا جا سکے۔ بجٹ میں کاروباری برادری کے مسائل کے حل کے لیے ٹریڈرز ویلفیئر بورڈ کے قیام کا بھی اعلان کیا گیا، جو تاجروں کے مسائل کا حل نکالے گا۔
بجٹ میں صحت کے لیے بھی بڑے التزامات کیے گئے ہیں۔ پی ایم جن آروگیہ یوجنا کے تحت دہلی کے عوام کو 10 لاکھ روپے تک کا ہیلتھ انشورنس فراہم کیا جائے گا۔ اس میں 5 لاکھ روپے مرکز اور 5 لاکھ روپے دہلی حکومت دے گی۔ اس اسکیم کے لیے بجٹ میں 2144 کروڑ روپے مختص کیے گئے ہیں۔ریکھا گپتا نے بجٹ تقریر میں سابق حکومت پر بھی طنز کیا۔ انہوں نے کہا کہ “پچھلی حکومت کے وزیر اعلیٰ نے اپنے لیے لاکھوں روپے کا ٹوائلٹ بنوایا، ہم جھگی والوں کے لیے بیت الخلا بنائیں گے۔” انہوں نے جھگی بستیوں کے لیے 696 کروڑ روپے مختص کرنے کا اعلان کیا، جس کے تحت جھگیوں میں سڑک، پانی اور دیگر بنیادی سہولیات فراہم کی جائیں گی۔بی جے پی حکومت نے کہا کہ یہ بجٹ دہلی کی تعمیرِ نو اور ترقی کی سمت میں ایک مضبوط قدم ہے۔ وزیر اعلیٰ نے کہا کہ حکومت دہلی کو ایک جدید، صاف ستھرا اور رہنے کے قابل شہر بنانے کے لیے پرعزم ہے۔
