موسم سرما کے آخری ایام میں ابھی لوگ پوری طرح گرمی کا سامنا کرنے کے لیے تیار بھی نہیں ہوپائے تھے کہ اچانک موسم کا مزاج تقریباً مکمل طور پر بدل گیا ہے جس کے نتیجے میں دہلی ۔این سی آرمیں فروری کے تیسرے ہفتے میں ہی اپریل جیسی گرمی محسوس ہونے لگی ہے۔ منگل کے روز (17 فروری) کو زیادہ سے زیادہ درجہ حرارت 29 ڈگری پہنچنے کا امکان ظاہر کیا گیا ہے۔ حالانکہ محکمہ موسمیات کی جانب سے 18 فروری کو ہلکی بارش کی بھی پیش گوئی کی گئی ہے جس کے بعد درجہ حرارت میں ایک بارپھر تبدیلی دیکھنے کو مل سکتی ہے۔
دہلی-این سی آر میں موسم کے اتار چڑھاؤ سے لوگ بھی پس وپیش میں ہیں۔ حالیہ دنوں میں کڑاکے کی سردی اور کہرے سے پریشان ہوئے لوگ کوئی بھی اندازہ لگانے کی حالت میں نہیں ہیں۔ کچھ حلقوں کی جانب سے موسم کا رُخ بدلنے پر کہرا اور آلودگی بڑھنے کا بھی اندیشہ ظاہر کیا جارہا ہے۔ صبح کے وقت ہلکا کہرا نظر آنے کے بعد دن میں آسمان رہے گا اور سورج بھی چمکتا نظرآئے گا۔ اس طرح اگلے 24 گھنٹوں میں درجہ حرارت میں کوئی بڑی تبدیلی نہیں آئے گی، البتہ اس کے بعد بتدریج اضافے کے اشارے مل رہے ہیں۔
گزشتہ 24 گھنٹوں کے دوران کم سے کم درجہ حرارت میں 1-2 ڈگری سیلسیس کی کمی درج کی گئی ہے۔ کم سے کم درجہ حرارت 10-12 ڈگری سیلسیس اور زیادہ سے زیادہ درجہ حرارت 24-27 ڈگری سیلسیس کے درمیان رہا۔ اس دوران کہیں سے بھی بارش کی اطلاع نہیں ہے اور مغرب سے تقریباً 15 کلومیٹر فی گھنٹہ کی رفتار سے ہوائیں چل رہی تھیں۔
