نئی دہلی: نائب صدر جماعت اسلامی ہند ملک معتصم خان نے ناگپور میں ہونے والے فرقہ وارانہ تشدد کی سخت الفاظ میں مذمت کی ہے ۔اپنے ایک پریس بیان میں انہوں نے کہا کہ ریاستی حکومت ان لوگوں کے خلاف کریک ڈاؤن کرنے میں مکمل طور پر ناکام رہی جو تاریخ کو ہتھیار بنا کر اور فرقہ وارانہ فساد کو ہوا دے کر بدامنی کو ہوا دے رہے تھے۔ انہوں نے کہا کہ مہاراشٹرا پولیس کو نفرت انگیز تقاریر کرنے والے سماج دشمن عناصر کو کھلا ہاتھ دینے کے لیے کہا جاتا ہےجس سے ریاست میں پرامن ماحول خراب ہو رہا ہے ۔
انہوں نے کہا کہ ہم حکام سے مطالبہ کرتے ہیں کہ نفرت کو ہوا دینے اور فرقہ وارانہ ہم آہنگی میں خلل ڈالنے والے افراد کے خلاف سخت کارروائی کی جائے۔ ہم مہاراشٹر کے لوگوں بالخصوص ناگپور کے شہریوں سے اپیل کرتے ہیں کہ وہ امن برقرار رکھیں اور سماج دشمن عناصر کی اشتعال انگیزیوں کا شکار نہ ہوں۔ اس طرح کے تفرقہ انگیز حربوں کا بہترین جواب اتحاد اور تحمل ہے۔
