نیشنل ٹیسٹنگ ایجنسی نے جمعرات کی دیر شام نیٹ یو جی 2026 کے نتائج کا اعلان کر دیا۔ نتائج کے اجرا کے ساتھ ہی ملک بھر میں میڈیکل کالجوں میں داخلے اور کاؤنسلنگ کے عمل کو مقررہ وقت کے مطابق آگے بڑھانے کی راہ ہموار ہو گئی ہے۔ امیدوار اپنا اسکور کارڈ نیشنل ٹیسٹنگ ایجنسی (این ٹی اے) کی سرکاری ویب سائٹ پر دیکھ سکتے ہیں۔
اس سال نیٹ یو جی امتحان پرچہ لیک ہونے کے معاملے کے بعد دوبارہ منعقد کیا گیا تھا۔ دوبارہ ہونے والے اس امتحان میں ہندوستان اور بیرونِ ملک سے تقریباً 20 لاکھ امیدواروں نے شرکت کی۔ امتحان ہندوستان کے 551 شہروں اور بیرونِ ملک 14 شہروں میں قائم 5440 امتحانی مراکز پر منعقد ہوا تھا۔
این ٹی اے کے مطابق مجموعی طور پر 11.21 لاکھ امیدوار ایم بی بی ایس، بی ڈی ایس، آیوش اور دیگر متعلقہ طبی کورسز میں داخلے کے لیے اہل قرار پائے ہیں۔ کامیاب امیدواروں میں 58 فیصد سے زائد طالبات شامل ہیں۔ طالبات کی کامیابی کی شرح بھی طلبہ کے مقابلے میں زیادہ رہی۔ امتحان میں شریک 56.8 فیصد طالبات کامیاب ہوئیں، جبکہ طلبہ کی کامیابی کی شرح 55.1 فیصد ریکارڈ کی گئی۔
پنجاب کے آرین گپتا اور ہریانہ کے پانشول بنسل نے 715 نمبر حاصل کر کے مشترکہ طور پر ملک میں پہلی پوزیشن حاصل کی۔ اس کے علاوہ 1492 امیدواروں نے 650 یا اس سے زیادہ، 10160 امیدواروں نے 600 یا اس سے زیادہ اور 90780 امیدواروں نے 500 یا اس سے زیادہ نمبر حاصل کیے ہیں۔
این ٹی اے نے بتایا کہ تمام 36 ریاستوں اور مرکز کے زیر انتظام علاقوں سے امیدوار کامیاب ہوئے ہیں۔ اتر پردیش سے سب سے زیادہ 1.7 لاکھ سے زائد امیدوار کامیاب قرار پائے، جبکہ لکشدیپ سے 43 امیدواروں نے امتحان میں کامیابی حاصل کی۔ ریاستی سطح کے نمایاں امیدواروں میں لداخ کی جگمیت یانگچین لامو، انڈمان و نکوبار کے دھرو تریپاٹھی اور لکشدیپ کی فہمیدہ انیس شامل ہیں۔
زمرہ وار کامیاب امیدواروں میں عمومی زمرے کے 2.91 لاکھ، دیگر پسماندہ طبقات کے 5.12 لاکھ، درج فہرست ذاتوں کے 1.59 لاکھ، درج فہرست قبائل کے 63716، معاشی طور پر کمزور طبقے (ای ڈبلیو ایس) کے 95026، خصوصی صلاحیت کے حامل امیدواروں کے 3666 اور خصوصی معذوری کے زمرے کے 303 امیدوار شامل ہیں۔ نیٹ یو جی 2026 کا امتحان 13 زبانوں میں منعقد کیا گیا تھا جن میں اردو بھی شامل ہے۔ نیشنل ٹیسٹنگ ایجنسی نے امیدواروں کو جعلی فون کالز، پیغامات اور میڈیکل سیٹ دلانے کے نام پر ہونے والی دھوکہ دہی سے محتاط رہنے کی بھی ہدایت کی ہے۔
