انڈین ریلوے کے ٹرین سفر سے متعلق بورڈنگ قوانین میں بڑی تبدیلی ہونے والی ہے جس کا کروڑوں مسافروں پر براہ راست اثر پڑے گا۔ نیا نظام نافذ ہونے کے بعد اگر کوئی مسافر اپنے مقررکردہ بورڈنگ اسٹیشن سے ٹرین میں سوار نہیں ہوتا ہے توٹی ٹی ای اگلے اسٹیشن تک اس کا انتظار نہیں کرے گا۔ جیسے ہی ٹرین بورڈنگ اسٹیشن سے روانہ ہوگی اور مسافر اپنی سیٹ پر نہیں ملے گا، اس کی سیٹ کو فوری طور پر خالی مان لیا جائے گا۔ نئے قوانین کے تحت چیکنگ کے دوران ٹی ٹی ای پہلے اپنے ہینڈ ہیلڈ ڈیوائس پرفوراً ’نوٹ ٹرن اپ‘ کی انٹری کرے گا۔ اس کا مطلب ہوگا کہ متعلقہ مسافر اسٹیشن سے سوار نہیں ہواہے۔ وہیں انٹری ہوتے ہی وہ سیٹ سسٹم کے ذریعہ خالی مانی جائے گی اور ٹی ٹی ای کے پاس اسے روک کر رکھنے کا کوئی متبادل نہیں رہےگا۔
ریلوے کی اس تبدیلی سے ویٹنگ لسٹ اور آر اے سی ٹکٹ پر سفر کرنے والے مسافروں کو فائدہ ملے گا۔ جیسے ہی کوئی سیٹ خالی قرار دی جاتی ہے، ریلوے سسٹم خود بخود وہ برتھ ویٹنگ لسٹ میں اگلے مسافر کو الاٹ کر دے گا۔ سیٹ الاٹ ہونے کے بعد مسافر کے موبائل فون پر میسیج جائے گا، جس سے اسے فوری کنفرمیشن مل جائے گی۔ وزارت ریلوے نے ریلوے کو ہدایت کی ہے کہ اس نئے نظام کو نافذ کرنے کے لیے سافٹ ویئر میں ضروری تبدیلیاں کی جائیں۔ اس کے لیے ریلوے انفارمیشن سسٹم کو ذمہ داری سونپی گئی ہے۔ سسٹم کو اپ ڈیٹ کرنے کے بعد اس اصول کو ملک بھر کی ٹرینوں میں نافذ کیا جا سکتا ہے جس سے خالی سیٹوں کا بہتر انتظام ہوسکےگا۔
ریلوے کے اعداد و شمار کے مطابق ہر ٹرین میں تقریباً 3 سے 5 فیصد مسافر یا تو اپنا سفر منسوخ کر دیتے ہیں یا وقت پر اپنے بورڈنگ اسٹیشن تک پہنچنے میں ناکام رہتے ہیں۔ ماہرین کا کہنا ہے کہ ایسے مسافروں کو اب مزید چوکس رہنے کی ضرورت ہوگی۔ اگر کسی وجہ سے مسافر طے شدہ اسٹیشن کی بجائے کسی اگلے اسٹیشن پر سوار ہوتا ہے تو چارٹ بننے سے کم سے کم 24 گھنٹے پہلے بورڈنگ اسٹیشن تبدیل کرنا ضروری ہوگا۔ ایسا نہ کرنے پرسیٹ کسی دوسرے مسافر کو الاٹ ہو جائے گی اور مسافر اس کا دعویٰ بھی نہیں کر سکے گا۔ تاہم ریلوے کا خیال ہے کہ یہ فیصلہ ڈیجیٹلائزیشن کی سمت میں بڑا قدم ہے۔ اس سے سیٹ ایلوکیشن کا عمل مکمل طور پر شفاف ہو جائے گا اور خالی سیٹوں کے بارے میں تاخیر اور شکایات میں کمی آئے گی۔
