ہریدوار واقع مشہور گنگا گھاٹ ’ہر کی پوڑی‘ میں اب غیر ہندوؤں کا داخلہ ممنوع ہو گیا ہے۔ ’گنگا سبھا‘ کی طرف سے کئی مقامات پر بورڈ لگا دیے گئے ہیں، جن پر لکھا گیا ہے کہ یہاں غیر ہندوؤں کا آنا ممنوع ہے۔ بورڈ لگنے کے بعد سیاسی سرگرمیاں بھی تیز ہو گئی ہیں اور طرح طرح کے بیانات سامنے آ رہے ہیں۔ ’ہر کی پوڑی‘ کے ’برھم کنڈ‘ میں گنگا سبھا کے ذریعہ غیر ہندوؤں کے آنے پر پابندی کے بورڈ لگائے گئے ہیں، جس کی تصویریں سوشل میڈیا پر بھی سامنے آئی ہیں۔
گنگا سبھا، ہر کی پوڑی کے سربراہ پنڈت نتن گوتم نے کہا کہ 1916 میں برطانوی حکومت کے وقت نگر پالیکا کے تحت میونسپل ایکٹ بنا تھا، جس میں ’ہر کی پوڑی‘ میں غیر ہندوؤں کے داخلہ پر پابندی عائد کی گئی تھی۔ انھوں نے کہا کہ اس قانون کے بارے میں لوگوں کو پوری طرح سے جانکاری نہیں تھی، اس لیے گنگا سبھا نے اس جانکاری کو زیادہ سے زیادہ لوگوں تک پہنچانے کے لیے ’ہر کی پوڑی‘ کے سبھی دروازوں پر بورڈ لگا دیے ہیں۔
پنڈت نتن گوتم کا کہنا ہے کہ انگریزوں کی حکومت کو ہم ہندوؤں کے جذبات کا پورا خیال تھا۔ اس لیے انھوں نے 1916 میں یہ ایکٹ بنایا تھا۔ اب بی جے پی کی ہماری حکومت ہے اور ہماری حکومت کو چاہیے کہ وہ اس ایکٹ کی توسیع کرے۔ انھوں نے یہ بھی کہا کہ کمبھ والے علاقہ میں بھی غیر ہندوؤں کے جانے پر پابندی عائد کی جانی چاہیے۔
ہر کی پوڑی میں غیر ہندوؤں کا داخلہ ممنوع ہونے کا بورڈ لگنے کے بعد سادھو سنتوں نے خوشی کا اظہار کیا ہے۔ گنگا گھاٹ پر پہنچے کچھ ہندو عقیدتمندوں نے بھی اس قدم کی حمایت کی ہے۔ عقیدتمندوں کا کہنا ہے کہ ہمارے علاقہ میں دیگر مذاہب کے لوگوں کا آنا منع ہونا ہی چاہیے، کیونکہ گنگا ایک پاکیزہ ندی ہے۔ سادھو سنتوں کا اس تعلق سے کہنا ہے کہ دیگر مذاہب کے لوگ، مثلاً عیسائی اور مسلمان، گائے کا گوشت کھاتے ہیں، جو ہندو مذہب میں ممنوع ہے۔ اسی لیے مسلمانوں یا عیسائیوں کا ’ہر کی پوڑی‘ میں داخلہ ممنوع ہونا ہی چاہیے۔
