’آپریشن سندور‘ کے بعد پاکستان نے ہندوستان کے خلاف جھوٹ پر مبنی پروپیگنڈا تیز کر دیا ہے۔ اس کا جواب دیتے ہوئے حکومت ہند نے ایک بڑا سفارتی قدم اٹھاتے ہوئے ’ڈپلومیسی اسٹرائیک‘ کا آغاز کیا ہے۔ اس کا مقصد عالمی برادری کے سامنے پاکستان کا اصل چہرہ بے نقاب کرنا اور دہشت گردی کے خلاف ہندوستان کے مؤقف کو مضبوطی سے پیش کرنا ہے۔
مرکزی حکومت نے فیصلہ کیا ہے کہ 45 اراکین پارلیمنٹ پر مشتمل نمائندہ وفود کو مختلف ممالک بھیجا جائے گا، جہاں وہ ہندوستان کا مؤقف رکھیں گے۔ یہ وفود 22 مئی کے بعد روانہ ہوں گے۔ پارلیمانی امور کی وزارت اس کوشش کی قیادت کر رہی ہے اور وزیر کرن رجیجو تمام سیاسی پارٹیوں کے لیڈران سے رابطے میں ہیں۔
اطلاعات کے مطابق یہ وفود آٹھ مختلف ممالک کا دورہ کریں گے، جہاں یہ عالمی حکومتوں، تھنک ٹینکس، میڈیا اداروں اور پالیسی سازوں سے ملاقات کریں گے۔ ہر وفد میں مختلف پارٹیوں سے تعلق رکھنے والے تقریباً چھ اراکین شامل ہوں گے، تاکہ یہ پیغام دیا جا سکے کہ دہشت گردی کے خلاف ہندوستانی مؤقف سیاسی نہیں بلکہ قومی ہے۔
اسدالدین اویسی، ششی تھرور، روی شنکر پرساد، سنجے جھا، تیجسوی سوریہ، سپریا سولے، منیش تیواری جیسے معروف چہرے بھی ان وفود میں شامل ہوں گے۔ ان کا مقصد پاکستان کے دہشت گردانہ نیٹ ورکس اور ہندوستان کے صبر و تحمل پر مبنی ردعمل کو دنیا کے سامنے رکھنا ہے۔
Read more on Qaumiawaz.com
