وزیر اعظم نریندر مودی آج سعودی عرب کے دو روزہ دورے پر جدہ پہنچ رہے ہیں، جو ان کا سعودی عرب کا تیسرا دورہ ہوگا۔ یہ دورہ اس لحاظ سے تاریخی ہے کہ گزشتہ چالیس برسوں میں پہلی بار کوئی بھارتی وزیر اعظم جدہ کا دورہ کر رہا ہے۔ دورے کی دعوت سعودی ولی عہد محمد بن سلمان نے دی ہے۔ مودی اور ولی عہد کی ملاقات میں حج کوٹے میں اضافے، سرمایہ کاری، توانائی، سائنس، خلا، صحت اور ٹیکنالوجی جیسے شعبوں میں کم از کم چھ معاہدوں پر دستخط متوقع ہیں۔ دونوں رہنما 2019 میں قائم ہند-سعودی اسٹریٹجک پارٹنرشپ کونسل کی میٹنگ کی صدارت بھی کریں گے۔ وزیر اعظم ایک فیکٹری کا دورہ بھی کریں گے جہاں بھارتی کارکن موجود ہیں۔ ہندوستانی سفیر سہیل اعجاز خان کے مطابق جدہ تاریخی تجارتی مرکز رہا ہے اور آج بھی دونوں ممالک کے قریبی تعلقات کا مظہر ہے۔ یہ دورہ دوطرفہ تعلقات میں اہم پیش رفت ثابت ہو سکتا ہے۔
More on Qaumiawaz.com
