جدہ ۔ حج سیزن 2026کی کامیاب تکمیل کے بعد جدہ میں ہندوستانی قونصل خانے نے حج 2027 کی تیاریوں کا باضابطہ آغاز کر دیا۔ جدہ میں قونصل جنرل ہند فہد احمد خان سوری نے صحافیوں سے گفتگو کرتے ہوئے آئندہ حج کے انتظامات، سعودی عرب کے مغربی خطہ میں مقیم ہندوستانی برادری کیلئے فلاحی اقدامات، قونصلر خدمات میں بہتری اور ہندوستان کے چھٹے نیشنل فیملی ہیلتھ سروے (NFHS-6) کے اہم نتائج سے آگاہ کیا۔اس موقع پر پریس و اطلاعات کے قونصل اور ہیڈ آف چانسری امام مہدی حسین بھی موجود تھے۔فہد احمد خان سوری نے بتایا کہ گزشتہ حج کے دوران ہندوستان کے مکمل 1لاکھ 75 ہزار عازمین کیلئے مؤثر انتظامات کیے گئے جن میں تقریباً 70 فیصد عازمین نے حج کمیٹی آف انڈیا جبکہ 30 فیصد نے نجی حج گروپس کے ذریعے فریضۂ حج ادا کیا۔ انہوں نے کہا کہ منیٰ، عرفات اور مزدلفہ تک عازمین کی بروقت رسائی، طبی امدادی نظام، بغیر سامان کے سفر، ریموٹ سٹی چیک اِن اور حرمین ہائی اسپیڈ ریلوے کے بڑھتے استعمال نے حج انتظامات کو مزید منظم اور آسان بنایا گیا۔انہوں نے بتایا کہ ہندوستان میں 10 ہزار عازمین کیلئے نسک کارڈ کا پائلٹ منصوبہ کامیاب رہا جسے آئندہ مزید وسعت دی جائے گی جبکہ مدینہ منورہ میں تمام ہندوستانی حجاج کیلئے رہائش فراہم کی گئی۔
انہوں نے بتایا کہ حج 2027 کیلئے درخواستوں کا عمل تقریباً مکمل ہو چکا ہے اور قرعہ اندازی رواں ماہ کے اختتام تک متوقع ہے۔ اس ضمن میں ہندوستان کی وزارتِ اقلیتی امور اور سعودی حکام کے ساتھ رہائش، ٹرانسپورٹ اور کیٹرنگ سمیت مختلف شعبوں میں مسلسل رابطہ جاری ہے۔ہندوستان برادری کیلئے قونصلر خدمات کا ذکر کرتے ہوئے انہوں نے بتایا کہ گزشتہ مالی سال کے دوران قونصل خانے نے 1 لاکھ 19 ہزار سے زائد پاسپورٹ درخواستوں اور 38 ہزار سے زیادہ تصدیقی خدمات انجام دیں۔
فہد احمد خان سوری نے کہا کہ قونصل خانہ عوامی شکایات کے مؤثر ازالے، جدید سہولتوں، ماہانہ اوپن ہاؤس اجلاسوں، ہندوستانی محنت کشوں کی فلاح، پریشان حال شہریوں، قیدیوں اور ضرورت مند تارکینِ وطن کی معاونت کے لیے اپنی خدمات مزید وسعت دے رہا ہے۔ انہوں نے اس عزم کا اظہار کیا کہ ہندوستانی برادری کے تعاون سے مستقبل میں مزید تجارتی، ثقافتی اور سماجی سرگرمیوں کا انعقاد کیا جائے گا۔
