امریکی صدر ڈونالڈ ٹرمپ کے حالیہ اعلان نے ہندوستانی شیئر بازار میں ہلچل مچا دی ہے۔ ٹرمپ نے فارما سمیت کچھ دیگر سیکٹرس پر نئے ٹیرف لگانے کا عندیہ دیا ہے، اور خاص طور سے فارما پروڈکٹس پر ’100 فیصد ٹیرف‘ عائد کرنے کا اعلان کیا ہے۔ اس اعلان کا براہِ راست اثر ہندوستانی شیئر بازار میں دیکھا جا رہا ہے۔ صبح سے ہی بازار دباؤ میں کھلا اور کاروبار کے دوران بھاری گراوٹ درج کی گئی۔ اس وقت سنسیکس 412.67 پوائنٹس گر کر 80,747.01 پر آ گیا ہے، جبکہ نفٹی 115 پوائنٹس کی کمی کے ساتھ 24,776 پر ٹریڈ کر رہا ہے۔
فارما سیکٹر پر اس اعلان کا سب سے زیادہ اثر دیکھا جا رہا ہے کیونکہ ان کمپنیوں کا امریکہ میں بڑا ایکسپوزر ہے۔ نتیجہ یہ ہوا کہ کئی بڑی ہندوستانی فارما کمپنیوں کے شیئرس زمین پر آ گئے۔ اروندو فارما کے شیئرس 1.91 فیصد گر کر 1,076 روپے پر آ گئے ہیں، جبکہ لیوپن تقریباً 3 فیصد ٹوٹ کر 1,918.60 روپے پر ٹریڈ کر رہا ہے۔ سن فارما کے شیئرس میں 3.8 فیصد کی بھاری گراوٹ درج ہوئی اور یہ 1,580 روپے پر پہنچ گئے۔ اسی طرح سپلا کے شیئرس میں بھی 2 فیصد کی کمی دیکھی گئی ہے۔
دیگر کمپنیوں میں اسٹرائیڈس فارما سائنس 6 فیصد، نیٹکو فارما 5 فیصد، بایوکان 4 فیصد، گلین فارما 3.7 فیصد، ڈیویلیب 3 فیصد، آئی پی سی اے لیب 2.5 فیصد اور زائیڈس لائف 2 فیصد کی کمی کے ساتھ ٹریڈ کر رہی ہیں۔ مینکائنڈ فارما میں بھی 3.30 فیصد کی بھاری گراوٹ درج کی گئی ہے۔
بی ایس ای کے ٹاپ 30 شیئرس میں سب سے زیادہ گراوٹ سن فارما کے شیئرس میں 3.8 فیصد رہی۔ اس کے علاوہ انفوسس، ٹیک مہندرا اور ایشین پینٹس جیسے دیگر بڑے شیئرس بھی 2 فیصد تک ٹوٹ گئے ہیں۔ تاہم، کچھ ہی شیئرس میں ہلکی سی تیزی دیکھنے کو ملی ہے۔
مجموعی طور پر ٹرمپ کے اعلان نے ہندوستانی سرمایہ کاروں میں گھبراہٹ پیدا کر دی ہے اور فارما سیکٹر پر اس کا سب سے زیادہ منفی اثر پڑ رہا ہے۔
read more……qaumiawaz.com
