یو اے ای کے وزیر سیاحت و اقتصادی امورکی لوک سبھا اسپیکر اوم برلا سے ملاقات

یو اے ای کے وزیر سیاحت نے مرکزی وزیر برائے شہری ہوا بازی رام موہن نائیڈو کنجاراپو سے بھی ملاقات کی۔ ملاقات کے بعد رام موہن نائیڈو نے ’ایکس‘ پر لکھا کہ ’’یو اے ای کے وزیر برائے معیشت و سیاحت عبداللہ بن طوق المری سے ملاقات کر کے خوشی ہوئی۔ ہندوستان اور یو اے ای کے مضبوط دوطرفہ تعلقات کے مرکز میں ہمیشہ سے ایریل کنیکٹیویٹی کو بڑھانے پر زور رہا ہے۔ ہندوستان کے تیزی سے بڑھتے ہوئے ہوا بازی کے شعبے میں تعاون کے نئے مواقع، خصوصاً مینٹیننس، ریپیئر اینڈ اوورہال (ایم آر او) اور مینوفیکچرنگ پر بامقصد تبادلۂ خیال ہوا۔‘‘

ہندوستان اور یو اے ای دنیا کی قدیم ترین اور مضبوط تجارتی شراکت داریوں میں شمار کیے جاتے ہیں۔ 1960 کی دہائی میں تیل کی دریافت اور 1971 میں یو اے ای کے وفاقی ملک بننے کے بعد دونوں ممالک کے تعلقات کو ایک نئی رفتار ملی۔ گزشتہ ایک دہائی کے دوران یہ رشتہ روایتی تجارتی شراکت داری سے آگے بڑھ کر ایک ’جامع اسٹریٹجک شراکت داری‘ میں تبدیل ہو چکا ہے۔ اب یہ تعاون تجارت، سرمایہ کاری، توانائی، ٹیکنالوجی اور عوامی روابط تک وسعت اختیار کر چکا ہے۔ آج ہندوستان اور یو اے ای اپنے اپنے خطوں میں ایک دوسرے کے اہم ترین اقتصادی شراکت داروں میں شامل ہیں اور دونوں ممالک کے تعلقات 21ویں صدی میں کامیاب دوطرفہ تعاون کی ایک بہترین مثال بن چکے ہیں۔