نئی دہلی: مقدس حج کی ادائیگی کے لیے سعودی عرب کے مقدس شہروں مکہ اور مدینہ روانہ ہونے والے عازمینِ حج کی پروازیں اس ماہ کی 30 تاریخ سے شروع ہوں گی۔ اس سے قبل ہر سال کی طرح اس سال بھی دہلی اسٹیٹ حج کمیٹی کے دفتر حج منزل میں عازمینِ حج کے لیے ٹیکہ کاری کیمپ کا انعقادکیا گیا ہے ۔ ٹیکہ لگانے کے کیمپ کا افتتاح کرتے ہوئے دہلی اسٹیٹ حج کمیٹی کی چیئرپرسن محترمہ کوثر جہاں نے کیمپ میں موجود عازمینِ حج، خصوصاً خواتین عازمین سے ملاقات کی اور انہیں حج پر جانے کی مبارکباد پیش کی ۔ انہوں نے بتایا کہ اس سال سفر حج کو گزشتہ برسوں کے مقابلے میں زیادہ منظم اور آسان بنانے کے لیے متعدد نئی سہولیات فراہم کی گئی ہیں۔ محترمہ کوثر جہاں نے بتایا کہ حج منزل میں کئی نئی سہولیات متعارف کرائی گئی ہیں تاکہ عازمین کو کسی قسم کی دقت کا سامنا نہ ہو۔ ان میں سعودی ریال، ٹریول کارڈ، حج سہولت ایپ، تربیتی ڈیسک، اور آنے والے دنوں میں آرام دہ رہائش کے لیے ایئر کنڈیشنڈ حج کیمپ اور پینے کے لیے ٹھنڈے پانی کی سہولت شامل ہے ۔
واضح رہے کہ 30 اپریل سے 30 مئی تک حج پروازوں کا سلسلہ جاری رہے گا۔ پہلے مرحلے میں 15 مئی تک تمام پروازیں مدینہ منورہ جبکہ 16 مئی سے 30 مئی تک تمام پروازیں جدہ (مکہ) کے لیے روانہ ہوں گی۔ دہلی سے جدہ کے راستے حج پر جانے والے عازمین کے لیے احرام باندھنے کی سہولت اندرا گاندھی انٹرنیشنل ایئرپورٹ کے ٹرمینل 3 پر دستیاب کرائی جائے گی۔دہلی اسٹیٹ حج کمیٹی کے ایگزیکٹو آفیسر اشفاق احمد عار فی نے بتایا کہ اس سال عازمینِ حج کی سہولت کے لیے ٹیکہ کاری کا نظام حج پروازوں کے مطابق ترتیب دیا گیا ہے ۔ عازمین کو ان کی پرواز کی تاریخ کے مطابق انفرادی سطح پر کال کر کے ٹیکہ لگوانے کے لیے بلایا جا رہا ہے ۔ بصورتِ دیگر بغیر اطلاع کے آنے والے افراد کو اسی دن ٹیکہ نہیں لگایا جائے گی۔ آج کے کیمپ میں عازمینِ حج کے علاوہ حج ڈیوٹی پر جانے والے تقریباً 100 سرکاری افسران کو بھی ویکسین دی گئی۔خیال رہے کہ اس سال دہلی سے کل 2905 عازمین جبکہ دہلی ایمبارکیشن پوائنٹ سے کل 16400 عازمینِ حج مقدس سفر پر روانہ ہوں گے ۔
