پٹنہ: بہار اسمبلی انتخاب 2025 کے پہلے مرحلے کے لیے ووٹنگ جاری ہے۔ ریاست کے مختلف اضلاع میں ووٹنگ کا آغاز پُرجوش انداز میں ہوا۔ صبح 9 بجے تک کے اعداد و شمار کے مطابق تقریباً 13.13 فیصد ووٹنگ ریکارڈ کی گئی ہے۔ ریاست کے مختلف اضلاع میں ووٹنگ کے رجحان میں فرق دیکھا گیا۔ سہرسا ضلع 15.27 فیصد ووٹنگ کے ساتھ سب سے آگے رہا، جبکہ لکھی سرائے ضلع میں ووٹنگ کی رفتار سب سے کم رہی، جہاں صرف 7.00 فیصد ووٹ ڈالے گئے۔
اس موقع پر ریاست بھر میں جمہوریت کا جشن سا ماحول دیکھنے کو ملا۔ وزیر اعظم نریندر مودی اور بھارتیہ جنتا پارٹی کے قومی صدر جے پی نڈا نے ریاست کے عوام سے بڑی تعداد میں ووٹ ڈالنے کی اپیل کی ہے۔ دونوں رہنماؤں نے اسے جمہوریت کا عظیم تہوار قرار دیتے ہوئے کہا کہ ہر ووٹر کو اپنے حقِ رائے دہی کا استعمال کرنا چاہئے تاکہ مضبوط اور مستحکم بہار کی بنیاد رکھی جا سکے۔
بہار اسمبلی انتخابات کے پہلے مرحلے کے دوران لالو پرساد یادو کے خاندان نے جمعرات کو ووٹ ڈالنے کے بعد ریاست کے عوام سے تبدیلی کے لیے ووٹ کرنے کی پرزور اپیل کی۔ سابق وزیر اعلیٰ رابڑی دیوی نے اپنے اہل خانہ کے ہمراہ ووٹ ڈالنے کے بعد کہا کہ بہار کی عوام اس بار تبدیلی کے لیے تیار ہے اور مہاگٹھ بندھن کی حکومت بننے جا رہی ہے۔پٹنہ میں میڈیا سے بات کرتے ہوئے رابڑی دیوی نے کہا، ’’میری سبھی سے اپیل ہے کہ وہ ووٹ ضرور ڈالیں۔ یہ عوامی حق بھی ہے اور عوامی ذمہ داری بھی۔ میں سبھی ووٹروں کا شکریہ ادا کرتی ہوں اور امید کرتی ہوں کہ بہار کی تقدیر بدلنے میں ہر شخص اپنا کردار ادا کرے گا۔
