دہلی کا مشہور ’امرت ادیان‘ منگل (3 فروری) سے عام لوگوں کو دیکھنے کے لیے کھول دیا جائے گا۔ صدر جمہوریہ دروپدی مرمو نے اتوار (یکم فروری) کو امرت ادیان کے ’ونٹر اینول ایڈیشن 2026‘ کے افتتاح کے بارے میں بتایا ہے۔ لوگ ہفتے میں 6 روز صبح 10 بجے سے شام 6 بجے کے درمیان ’امرت ادیان‘ جا سکتے ہیں۔ داخلے کے لیے آخری وقت شام 5 بجے تک ہوگا۔ ’امرت ادیان‘ پیر کو بند رہے گا۔ اس روز دیکھ بھال (مینٹیننس) کے کاموں پر توجہ دی جائے گی۔ اس کے علاوہ، 4 مارچ کو ہولی کی وجہ سے بھی امرت ادیان بند رہے گا۔ اس سال آف لائن بکنگ کی کوئی سہولت نہیں ہوگی، زائرین صرف آن لائن طریقے سے ہی ٹکٹ بک کر سکتے ہیں۔
بیان کے مطابق فی الحال ’امرت ادیان‘ میں بکنگ اور داخلہ مفت ہے۔ زائرین کو مشورہ دیا جاتا ہے کہ وہ اپنے سلاٹ آن لائن پہلے سے ہی بک کر لیں۔ انہیں ٹکٹ میں بتائی گئی ٹائم لائن اور دیگر ہدایات پر عمل کرنے کے لیے بھی کہا گیا ہے۔ راشٹرپتی بھون کے اندر واقع گارڈن کمپلیکس 3 مارچ کو (دفاعی اہلکاروں کے لیے)، 5 مارچ کو (بزرگ شہریوں کے لیے)، 10 مارچ کو (خواتین اور قبائلی خواتین کے سیلف ہیلپ گروپس کے لیے) اور 13 مارچ کو معذور افراد کے لیے کھلے گا۔ کسی خاص دن کے لیے بکنگ اس سے پچھلے دن صبح 10 بجے بند ہو جائے گی۔
تمام زائرین کے لیے داخلہ اور اخراج راشٹرپتی اسٹیٹ کے گیٹ نمبر 35 سے ہوگا، جو نارتھ ایونیو اور راشٹرپتی بھون کے قریب ہے۔ زائرین کی سہولت کے لیے سنٹرل سیکرٹریٹ میٹرو اسٹیشن سے گیٹ نمبر 35 تک ہر 30 منٹ میں صبح 9:30 بجے سے شام 6:00 بجے کے درمیان شٹل بس سروس دستیاب رہے گی۔ سنٹرل سیکرٹریٹ میٹرو اسٹیشن سے آخری شٹل بس سروس شام 4:00 بجے ہوگی۔
زائرین کے لیے ’امرت ادیان‘ کا راستہ بال واٹیکا، پلومیریا گارڈن، برگد گارڈن، بونزائی گارڈن، ببلنگ بروک، سنٹرل لان، لانگ گارڈن اور سرکلر گارڈن ہوگا۔ ٹیولپ اور مختلف اقسام کے گلابوں کے علاوہ، اس سال زائرین ایک بہتی ہوئی ندی، جھرنوں والی پانی کی لہروں اور ریفليکسولوجی راستوں والا برگد گارڈن بھی دیکھ پائیں گے۔ امرت ادیان میں زائرین کے دیکھنے کے لیے گلاب کی 145 اقسام موجود ہیں، جن میں ’بھیم‘، ’ارجن‘ اور ’مدر ٹریسا‘ شامل ہیں۔ زائرین اپنے ساتھ موبائل فون، الیکٹرانک چابیاں، پرس یا ہینڈ بیگ، پانی کی بوتلیں اور چھوٹے بچوں کے لیے دودھ کی بوتلیں لے جا سکتے ہیں۔
