نئی دہلی: حج بیت اللہ 2026 کے لیے حج کمیٹی آف انڈیا کی جانب سے کی گئی آن لائن قرعہ اندازی میں دہلی سے 2071 عازمین حج کا انتخاب کیا گیا ہے۔ اس موقع پر دہلی اسٹیٹ حج کمیٹی کی چیئرپرسن کوثر جہاں نے منتخب عازمین کو مبارکباد دیتے ہوئے کہا کہ کمیٹی عازمین کو تمام تر سہولیات بروقت فراہم کرنے کے لیے پُرعزم ہے۔
ایگزیکٹیو آفیسر اشفاق احمد عارفی نے تفصیلات بتاتے ہوئے کہا کہ منتخب 2071 عازمین میں مخصوص زمرہ جات کے تحت 364 عازمین 65 سال سے زیادہ عمر کے ہیں، 65 سال سے زائد عمر کی دو خواتین بغیر محرم کے ایک ساتھی کے ساتھ شامل ہیں، جبکہ 45 سال یا اس سے زائد عمر کی 21 خواتین بغیر محرم شامل کی گئی ہیں۔ عمومی زمرہ میں 1684 عازمین کا انتخاب ہوا ہے۔
تمام منتخب عازمین کو ہدایت دی گئی ہے کہ وہ 20 اگست 2025 تک حج اخراجات کی پیشگی رقم 1,52,300 روپے فی کس آن لائن یا اسٹیٹ بینک آف انڈیا/یونین بینک آف انڈیا کی کسی بھی شاخ میں جمع کرائیں۔ ساتھ ہی، دستخط شدہ حج فارم، رنگین فوٹو، پاسپورٹ کی فوٹو کاپی، کینسل چیک، حلف نامہ، میڈیکل سرٹیفکیٹ اور دیگر مطلوبہ دستاویزات دہلی حج کمیٹی کے دفتر واقع حج منزل میں جمع کرانا لازمی ہے۔
مزید سہولت کے لیے دہلی حکومت کے اشتراک سے آصف علی روڈ پر واقع حج منزل میں میڈیکل کیمپ لگایا جائے گا۔ عازمین کسی بھی سرکاری اسپتال یا کلینک سے بھی ایلوپیتھک میڈیکل سرٹیفکیٹ حاصل کر سکتے ہیں۔
واضح رہے کہ دہلی سے 4973 درخواستیں موصول ہوئیں، جبکہ دہلی کا اصل کوٹہ 1241 ہے۔ بقیہ 830 عازمین کا انتخاب دیگر ریاستوں کے اضافی کوٹے سے ہوا ہے۔
read more……qaumiawaz.com
