بہار میں ایک طرف جہاں رسوئی گیس کے لیے لوگ پریشان نظر آ رہے ہیں، وہیں دوسری طرف پیر (6 اپریل) کی دیر رات مظفرپور ضلع میں ایل پی جی گیس کی غیر قانونی ریفلنگ کرنے والے ایک بڑے گروہ کا پردہ فاش ہوا۔ اس سلسلے میں گیس سے بھرا یک کنٹینر بھی برآمد کیا گیا ہے۔ پولیس کے مطابق ایس ایس پی کانتیش کمار مشرا کو خفیہ اطلاع ملی تھی کہ پولیس نے موتی پور تھانہ علاقہ کے نریار کے پاس ایک بڑے غیر قانونی ریفلنگ کا کاروبار چل رہا ہے۔ اسی اطلاع پر پولیس نے ڈی ایس پی مغربی سچترا کماری کی قیادت میں ایک ٹیم تشکیل دی۔ اس ٹیم میں ڈی ایس پی مغربی سچترا کماری کے ساتھ کانٹی اور موتی پور کے تھانہ انچارج سمیت موتی پور کے سرکل انسپکٹر کو شامل کیا گیا۔
پولیس ٹیم نے نریار کے پاس سڑک سے کچھ فاصلے پر واقع مشتبہ ٹھکانے پر چھاپے ماری کی، اس دوران پولیس نے ایک بڑے نیٹورک کو پکڑا جو براہ راست گیس ٹینکر سے چھوٹے سلنڈروں میں ریفلنگ کر رہا تھا۔ ڈی ایس پی مغربی سچترا کماری نے منگل (7 اپریل) کو بتایا کہ موقع سے ایل پی جی سے بھرا ایک کنٹینر، ایک بولیرو، ایک آٹو (ٹوٹو) اور 54 گیس سلنڈر برآمد کیا گیا ہے۔ بتایا گیا کہ مقامی سطح پر ڈیلیوری کے لیے ایک آٹو ضبط کیا گیا، جس پر کئی سلنڈر لدے تھے۔ گیس ٹینکر سے سلنڈروں میں گیس بھرنے کے لیے استعمال کیے جانے والے خصوصی پائپ اور دیگر آلات بھی ضبط کیے گئے ہیں۔ اس دوران پولیس کو دیکھ کر موجود غیر قانونی کاروباری اور مزدور بھاگنے میں کامیاب رہے۔ پولیس گاڑیوں کے رجسٹرڈ نمبر سے ان کے مالکان کا پتہ لگانے میں مصروف ہے۔
ڈی ایس پی مغربی سچترا کماری نے بتایا کہ اس معاملے کی تحقیقات کی جا رہی ہے۔ مظفرپور کے اسی ایس پی کانتیش کمار مشرا نے دعویٰ کیا کہ جلد ہی ملزمان کو گرفتار کر لیا جائے گا۔ انہوں نے خدشہ ظاہر کیا کہ اس گروہ کے تار نیپال سے جڑے ہو سکتے ہیں۔ ساتھ ہی انہوں نے لوگوں سے اپیل کی ہے کہ اپنے علاقے میں کسی بھی قسم کی غیر قانونی گیس کٹنگ کی اطلاع فوری طور پر پولیس کنٹرول روم کو دیں، تاکہ بروقت کارروائی کی جا سکے۔
