اداکار ایس دیون نے بھارتیہ جنتا پارٹی کے ریاستی نائب صدر کے ساتھ ساتھ پارٹی کی بنیادی رکنیت سے بھی استعفیٰ دینے کا اعلان کیا۔ اپنے استعفیٰ کے بارے میں، انہوں نے کہا، “میں جس سیاست پر یقین رکھتا ہوں وہ سری نارائن گرو کے نظریات، اصولوں اور پروگراموں پر مبنی ہے۔ کیرالم میں بھارتیہ جنتا پارٹی (بی جے پی) میں شامل ہونے اور پانچ سال تک پارٹی کے ساتھ کام کرنے کے بعد، میں نے محسوس کیا کہ میں اس راستے پر جاری نہیں رہ پا رہا ہوں۔
خبر رساں ایجنسی اے این آئی کی ایک رپورٹ کے مطابق، انہوں نے اتواریعنی16 اگست کو کیرالم کے الاپپوزا میں کانچیکولنگارا دیوی مندر میں منعقدہ ایک تقریب کے دوران اپنے عہدے سے استعفیٰ دینے کا اعلان کیا۔ انہوں نے کہا، “میں نے اپنا حتمی فیصلہ ہفتہ یعنی 15 اگست کو کیا تھا، اور یہاں بیٹھ کر ہی میں نے فیصلہ کیا کہ یہ اعلان اسی اسٹیج سے کروں گا۔یہاں بیٹھے ہوئی اماں اور دیگر معزز لوگوں کی موجودگی میں، میں نے یہ فیصلہ کیا۔” انہوں نے مزید کہا، “میں اپنا استعفیٰ پہلے ہی لکھ چکا ہوں۔ میں ریاستی نائب صدر کے عہدے کے ساتھ ساتھ بھارتیہ جنتا پارٹی (بی جے پی) کی بنیادی رکنیت سے بھی استعفیٰ دے رہا ہوں۔”
ایس دیون کے استعفیٰ کے اعلان کے بعد، تقریب میں موجود بی جے پی لیڈر بی رادھا کرشنا مینن نے مندر کی تقریب میں اپنے عہدے سے استعفیٰ دینے کے دیون کے فیصلے پر عدم اطمینان کا اظہار کیا۔ انہوں نے کہا، ‘مجھے نہیں معلوم کہ دیون نے 2047 تک ہندوستان کو آگے لے جانے کی بی جے پی کی کوششوں کا حصہ نہ بننے کا فیصلہ کیوں کیا، لیکن مجھے یقین ہے کہ یہ ان کے فیصلے کا اعلان کرنے کا صحیح پلیٹ فارم نہیں تھا۔’
