تہواروں اور جلوس کے دوران آدھی رات تک تیز آواز میں لاؤڈ اسپیکر، میوزیکل انسٹرومنٹ اور ایمپلی فائر بجانے کے معاملے میں بامبے ہائی کورٹ نے سخت موقف اختیار کیا ہے۔ عدالت نے ممبئی میں بڑھتی ہوئی صوتی اور فضائی آلودگی کا ازخود نوٹس لیتے ہوئے مہاراشٹر حکومت سے جواب طلب کیا ہے۔ عدالت نے سوال اٹھایا کہ جب اصول و ضوابط کے مطابق رات 10 بجے کے بعد لاؤڈ اسپیکر اور ایمپلی فائر کے استعمال کی اجازت نہیں ہے، تو جلوسوں میں آدھی رات تک تیز آوازیں کیوں ہوتی ہیں۔ عدالت نے یہ بھی کہا کہ ممبئی میں آلودگی کی صورتحال سنگین ہے، جس کے مدنظر پٹاخوں پر پابندی عائد کرنے پر غور کرنے کا یہ صحیح وقت ہو سکتا ہے۔
جسٹس جی ایس کلکرنی اور جسٹس نیلا گوکھلے کی ڈویژن بینچ نے 21 ستمبر کے حکم میں کہا کہ تہوار منانے اور جلوس نکالنے پر کوئی اعتراض نہیں ہے، لیکن اس کا انعقاد اس طرح کیا جانا چاہیے کہ عام شہریوں کے حقوق متاثر نہ ہوں۔ عدالت نے کہا کہ تیز آواز کا اثر خصوصاً بیمار افراد، بزرگوں اور طلباء پر پڑتا ہے۔ عدالت نے کہا کہ تقریبات ضروری ہیں، لیکن ہزاروں شہریوں کے قانونی حقوق کی خلاف ورزی کرکے نہیں۔ لوگوں کو مسلسل ہونے والے شور اور اس سے ہونے والی پریشانی کو خاموشی سے برداشت کرنے پر مجبور نہیں کیا جا سکتا۔
عدالت نے آدھی رات تک لاؤڈ اسپیکر اور تیز موسیقی بجانے کی اجازت دیے جانے کی دلیل پر سوال اٹھایا۔ بینچ نے کہا کہ جب ایسے آلات کے استعمال کی اجازت رات 10 بجے تک ہی ہے، تو جلوسوں میں رات 12 بجے تک تیز آواز میں موسیقی بجانے کی اجازت دینے کی کوئی معقول وجہ نظر نہیں آتی۔ عدالت نے شور پر قابو پانے سے متعلق ضوابط کو زمینی سطح پر نافذ نہ کیے جانے پر بھی تشویش ظاہر کی۔ اسی معاملے کو لے کر عدالت نے ازخود نوٹس لیتے ہوئے مفاد عامہ کی عرضی شروع کی ہے۔ ممبئی میں فضائی آلودگی کی صورتحال کو دیکھتے ہوئے ہائی کورٹ نے پٹاخوں کے حوالے سے بھی سخت تبصرہ کیا۔ عدالت نے کہا کہ یہ صحیح وقت ہو سکتا ہے، جب شور اور فضائی آلودگی پھیلانے والے پٹاخوں پر پابندی عائد کرنے پر غور کیا جائے۔ عدالت کا کہنا ہے کہ پٹاخوں سے نکلنے والا دھواں اور شور ماحول کو متاثر کرتا ہے۔ ایسے میں صحت مند ماحول برقرار رکھنے کے لیے اس معاملے پر سنجیدگی سے غور کرنا ضروری ہے۔
