چھتیس گڑھ کے جشپور ضلع میں کٹنی- گملا قومی شاہراہ نمبر 43 پر کل دیر رات ہوئے ہولناک حادثے نے پورے علاقے کو ہلا کر رکھ دیا ہے۔ دُلدُلا تھانہ علاقہ کے پتراٹولی میں ایک تیز رفتار کار کھڑے ٹریلر میں گھس گئی۔ ٹکراتنی شدید تھی کہ کار کے پڑخچے اُڑ گئے اور اس میں سوار سبھی 5 نوجوانوں کی موقع پر ہی موت ہوگئی۔
حادثے کا شکار کار تیز رفتارمیں تھی اور سڑک کے کنارے کھڑے ٹریلر سے سیدھے ٹکرا گئی۔ حادثہ کا منظراتنا خوفناک تھا کہ آس پاس کے لوگ بھی خوفزدہ ہوگئے۔ دُلدُلا تھانہ انچارج کے کے ساہو نے حادثے کی تصدیق کرتے ہوئے بتایا کہ سبھی متوفی کھٹنگا گاؤں (دُلدُلا علاقہ) کے رہنے والے تھے۔ مرنے والوں کی شناخت رادھے شیام یادو(26) ،ادے کمار چوہان( 18)، ساگر ترکی( 22)، انکت تِگا( 17) اور دیپک پردھان( 19) کے طور پر ہوئی ہے۔
اہل خانہ کے مطابق سبھی نوجوان آستا تھانہ علاقے کے ایک میلے سے واپس آرہے تھے۔ راستے میں اچانک یہ المناک حادثہ پیش آیا۔ متوفی رادھے شیام یادو کے بڑے بھائی مہیشور یادو نے بتایا کہ سبھی دوست رات گئے تک ساتھ تھے اور گھر کی طرف واپس لوٹتے وقت حادثہ پیش آیا۔
بتایا جارہا ہے کہ متوفی دیپک پردھان اپنے خاندان کا واحد سہارا تھا جس کی موت سے اس کے خاندان پرغم کا پہاڑ ٹوٹ پڑا ہے۔ لاشوں کو پوسٹ مارٹم اور قانونی کارروائی کے بعد لواحقین کے حوالے کرنے کی تیاریاں جاری ہیں۔ خیال کیا جا رہا ہے کہ حادثہ ڈرائیور کی تیز رفتاری کے باعث پیش آیا، حالانکہ پولیس اس کی تفصیلی تحقیقات کر رہی ہے۔
