راشٹریہ جنتا دل (آر جے ڈی) کے رہنما اور بہار میں مہاگٹھ بندھن کے وزیر اعلیٰ امیدوار تیجسوی یادو کا آج (9 نومبر) کویوم پیدائش ہے۔ ان کے حامیوں سمیت تمام لیڈر انہیں مبارکباد دے رہے ہیں لیکن اتر پردیش کے سابق وزیر اعلی اورسماجوادی پارٹی ( ایس پی) کے قومی صدر اکھلیش یادو نے مبارکباد دیتے ہوئے انہیں بہار کے اگلے وزیر اعلیٰ کے طور پر حلف لینے کے لیے نیک خواہشات پیش کی ہیں، جس کے بعد بہار کی سیاست میں نئی بحث شروع ہوگئی ہے۔
اکھلیش یادو نے آج صبح اپنے سوشل میڈیا ہینڈل’ ایکس‘ پر تیجسوی یادو کو مبارکباد دیتے ہوئے یہ بات لکھی ہے۔ اس پوسٹ کے ساتھ اکھلیش یادو نے بی جے پی کو نشانہ بناتے ہوئے صاف کیا کہ اپوزیشن اتحاد متحد ہے۔ ایس پی کے قومی صدر اکھلیش یادو نے’ ایکس‘ پر پوسٹ کرتے ہوئے لکھا کہ بہار کے مقبول’نوکری کے نائک‘ نوجوان لیڈر تیجسوی یادو کو سالگرہ کی دلی مبارکباد اور بہار کے اگلے وزیر اعلیٰ کے طور پر حلف لینے کے لیے نیک خواہشات!
اس موقع پر دیگر رہنما بھی سالگرہ کی مبارکباد دے رہے ہیں لیکن کسی نے وزیر اعلیٰ کے حلف کو اس انداز میں استعمال نہیں کیا۔ یہ بات پورے بہار میں بحث کا موضوع بن گئی ہے۔ واضح رہے کہ خود اکھلیش یادو اور سماج وادی پارٹی کے کئی لیڈر بہار میں انتخابی مہم چلا رہے ہیں۔ اکیلے اکھلیش یادو مہاگٹھ بندھن کے امیدواروں کے لیے 20 سے زیادہ ریلیاں کر چکے ہیں اور آج چار مزید جلسے کر رہے ہیں، باوجود اس کے کہ یہاں ایس پی کا ایک بھی امیدوار موجود نہیں ہے۔ اکھلیش یادو اپنی ہر ریلی میں عوام سے تیجسوی یادو کو وزیر اعلیٰ بنانے کی اپیل کر رہے ہیں۔ اپنے مخصوص انداز میں وہ کہتے ہیں کہ تیجسوی کے وزیر اعلی بننے سے بہار کے نوجوانوں کو روزگار ملے گا۔
