دہلی–این سی آر میں نومبر کے آغاز کے ساتھ ہی سردی نے اپنی موجودگی کا واضح احساس دلانا شروع کر دیا ہے۔ موسم میں مسلسل تبدیلی کے سبب دن اور رات دونوں وقت درجہ حرارت میں نمایاں کمی درج کی جا رہی ہے۔ لوگوں نے پہلی مرتبہ اس موسم میں خنکی کو پوری شدت کے ساتھ محسوس کیا ہے، خاص طور پر صبح اور شام کے اوقات میں۔
محکمہ موسمیات ہند (آئی ایم ڈی) کی رپورٹ کے مطابق، آنے والے دنوں میں درجہ حرارت مزید نیچے جا سکتا ہے۔ ماہرین کے مطابق 9 اور 10 نومبر تک رات کا کم سے کم درجہ حرارت 14 ڈگری سیلسیس تک گرنے کا امکان ہے، جبکہ دن کا زیادہ سے زیادہ درجہ حرارت تقریباً 27 ڈگری کے قریب رہے گا۔ اس ہفتے کے آغاز پر کم سے کم درجہ حرارت 16 ڈگری اور زیادہ سے زیادہ 29 ڈگری درج کیا گیا تھا، لیکن اگلے چند دنوں میں سردی کا زور بڑھنے کا امکان ہے۔
نوئیڈا، غازی آباد، گروگرام اور دہلی کے بیشتر حصوں میں اتوار کی رات کے بعد ہوا کی رفتار میں اضافہ دیکھا گیا ہے۔ محکمہ موسمیات کا کہنا ہے کہ تیز ہواؤں نے فضا میں موجود آلودگی کے ذرات کو بکھیرنے میں مدد کی ہے، جس کے باعث فضائی معیار میں بہتری آئی ہے۔ گزشتہ تین دنوں سے مسلسل ’بہت خراب‘ کی درجہ بندی میں رہا ایئر کوالٹی انڈیکس (اے کیو آئی) اب ’آرنج زون‘ یعنی ’خراب‘ زمرے میں پہنچ گیا ہے۔
ماحولیاتی ماہرین کا کہنا ہے کہ اگر ہوا کی رفتار اسی طرح برقرار رہی، تو آئندہ دنوں میں فضائی آلودگی کی سطح میں مزید کمی دیکھی جا سکتی ہے، جس سے لوگوں کو اسموگ کے اثرات سے کچھ راحت ملے گی۔ تاہم ان کے مطابق ہوا کے تیز رہنے سے رات کے اوقات میں سردی کی شدت بھی بڑھے گی۔
محکمہ موسمیات نے شہریوں کو مشورہ دیا ہے کہ صبح کے وقت باہر نکلتے وقت گرم کپڑوں کا استعمال کریں، کیونکہ اگلے ہفتے کے بعد درجہ حرارت مزید کم ہونے کی پیش گوئی کی گئی ہے۔ ان کے مطابق زیادہ سے زیادہ درجہ حرارت کے مقابلے میں کم سے کم درجہ حرارت میں تیزی سے گراوٹ آنے کی وجہ سے سردی کا احساس زیادہ ہو رہا ہے۔
