دیوبند: دارالعلوم دیوبند کی جانب سے واضح کیا گیا ہے کہ ادارہ کا سوشل میڈیا پر کوئی بھی آفیشیل اکاؤنٹ نہیں ہے، مگر کچھ لوگ دارالعلوم دیوبند کے نام سے جعلی اکاؤنٹس بنا کر ان سے پوسٹ کر رہے ہیں۔ ان پوسٹ کو دارالعلوم دیوبند کے پیغام کے طور پردیکھا جاتا ہے۔ اس لئے ادارہ کی جانب سے یہ واضح کیا جاتا ہے کہ سوشل میڈیا کے کسی بھی پلیٹ فارم پر دارالعلوم دیوبند کے نام سے کوئی اکاؤنٹ یا پیج ملے، تو اسے دارالعلوم دیوبند کا تصور نہ کیا جائے۔
واضح رہے کہ سوشل میڈیا پر دارالعلوم دیوبند سے منسوب کر کے کچھ جعلی اکاؤنٹس بنا کر اس سے مختلف قسم کے پیغامات عام کئے جا رہے ہیں۔ اس سے ادارہ کی ساکھ کو نقصان پہنچ رہا ہے۔ اس سلسلہ میں آج ادارہ کے مہتمم و شیخ الحدیث مولانا مفتی ابوالقاسم نعمانی نے جاری اعلان میں کہا کہ مختلف ذرائع سے یہ بات سامنے آ رہی ہے کہ دارالعلوم دیوبند کے نام سے سوشل میڈیا کے مختلف پلیٹ فارم پر متعدد اکاؤنٹس چلائے جا رہے ہیں۔ اس لیے واضح کیا جاتا ہے کہ دارالعلوم دیوبند کا سوشل میڈیا پر کوئی بھی آفیشل اکاؤنٹ نہیں ہے۔ دارالعلوم دیوبند سے متعلق تمام تر مستند خبریں، اعلانات اور معلومات صرف اور صرف دارالعلوم دیوبند کی آفیشیل ویب سائٹ (www.darululoom-deoband.com) پر ہی فراہم کی جاتی ہیں۔
ادارہ کی جانب سے کہا گیا ہے کہ اگر سوشل میڈیا کے کسی بھی پلیٹ فارم پر دارالعلوم کے نام سے کوئی اکاؤنٹ یا پیج (صفحہ) ملے، تو اسے ادارہ کا تصور نہ کیا جائے۔ لہٰذا گزارش ہے کہ دارالعلوم دیوبند کا نام استعمال کر کے سوشل میڈیا اکاؤنٹس نہ بنائیں۔ یہ عمل نہ صرف غلط فہمی اور انتشار کا باعث بنتا ہے بلکہ دارالعلوم دیوبند کے اصولوں اور ساکھ کے بھی خلاف ہے۔ چناں چہ، جن حضرات نے دارالعلوم دیوبند کے نام سے کوئی اکاؤنٹ یا پیج بنایا ہو، ان سے اپیل ہے کہ وہ ادارے کے نام سے جعلی اکاؤنٹس ختم کر دیں اور دارالعلوم دیوبند کی عزت و وقار کا احترام کریں۔
دارالعلوم دیوبند میں خواتین کی آمد و رفت پر عائد کی گئی پابندی کا فیصلہ انتظامیہ نے لیا واپس
