سونا–چاندی نئی بلندیوں پر، قیمتوں میں ریکارڈ اضافہ

نئی دہلی: ہندوستان میں قیمتی دھاتوں کی قیمتوں میں مسلسل تیزی دیکھنے کو مل رہی ہے اور بدھ کے روز سونا اور چاندی دونوں ہی اپنی بلند ترین سطح پر پہنچ گئے۔ اس اضافے کے بعد زیورات کی مارکیٹ اور سرمایہ کاروں کے حلقوں میں خاصی چہل پہل دیکھی گئی۔

انڈیا بلین جویلرز ایسوسی ایشن (آئی بی جے اے) کی جانب سے جاری کردہ تازہ اعداد و شمار کے مطابق، 24 قیراط سونا بڑھ کر 1,06,021 روپے فی 10 گرام پر پہنچ گیا ہے، جو منگل کو 1,04,424 روپے فی 10 گرام تھا۔ اس طرح محض 24 گھنٹوں کے دوران سونے کی قیمت میں 1,597 روپے کا نمایاں اضافہ درج کیا گیا۔ اسی طرح 22 قیراط سونا بھی بڑھ کر 97,115 روپے فی 10 گرام ہو گیا، جو پہلے 95,652 روپے تھا۔ 18 قیراط سونا 79,516 روپے فی 10 گرام تک پہنچ گیا، جو ایک دن پہلے 78,318 روپے پر دستیاب تھا۔

چاندی کے نرخوں میں بھی اضافہ دیکھنے کو ملا۔ بدھ کو ایک کلوگرام چاندی کی قیمت 1,23,220 روپے درج کی گئی، جبکہ اس سے ایک دن پہلے یہ 1,22,833 روپے فی کلوگرام تھی۔ اس طرح ایک دن میں چاندی کی قیمت میں 387 روپے کا اضافہ ریکارڈ کیا گیا۔

آئی بی جے اے دن میں دو بار، صبح اور شام، سونا اور چاندی کے ریٹس جاری کرتی ہے، جنہیں زیورات کے تاجروں اور سرمایہ کاروں کے لیے اہم رہنما مانا جاتا ہے۔

فیوچرز مارکیٹ میں بھی یہی رجحان برقرار رہا۔ ملٹی کموڈٹی ایکسچینج (ایم سی ایکس) پر اکتوبر 2025 کے سونے کے معاہدے کی قیمت 0.62 فیصد بڑھ کر 1,06,447 روپے فی 10 گرام پر بند ہوئی۔ دوسری طرف دسمبر 2025 کے چاندی کے معاہدے میں 0.27 فیصد کا اضافہ درج ہوا اور قیمت 1,24,863 روپے رہی۔

ماہرین کے مطابق، عالمی سطح پر قیمتی دھاتوں میں جاری تیزی، ہندوستانی مارکیٹ پر براہِ راست اثر ڈال رہی ہے، اور آنے والے دنوں میں بھی اس کا رجحان برقرار رہنے کے امکانات ہیں۔