ریاض : سعودی عرب کی قیادت میں یمن میں سرگرم اتحاد نے دارالحکومت ریاض پر حملے سے متعلق حوثی گروپ کے دعوے کو گمراہ کن قرار دیتے ہوئے مسترد کردیا ہے۔حوثیوں نے دعویٰ کیا تھا کہ انہوں نے ریاض میں سعودی تیل کمپنی آرامکو کی تنصیبات کو بیلسٹک میزائلوں اور ڈرونز سے نشانہ بنایا، تاہم سعودی اتحاد نے اس دعوے کی تردید کی ہے۔سعودی اتحاد کے ترجمان میجر جنرل ترکی المالکی نے سعودی اخبار الشرق الاوسط سے گفتگو میں کہا کہ حوثی گروپ یمن کے صوبے طائز میں ہونے والے جانی نقصان اور اپنے خلاف بڑھتے ہوئے عوامی غصے سے توجہ ہٹانے کی کوشش کر رہا ہے۔ ان کے مطابق حوثی عناصر ایسی کارروائیوں کے ذریعے اپنی حمایت اور جنگی صورتحال کے بارے میں ’فرضی فتوحات‘ کا تاثر پیدا کرنا چاہتے ہیں۔
دوسری جانب حوثی فوجی ترجمان یحییٰ سریع نے ہفتے کے روز کہا تھا کہ گروپ نے ریاض میں آرامکو کی ایک تنصیب کو میزائلوں اور ڈرونز سے نشانہ بنایا، جس کے نتیجے میں وہاں آگ بھڑک اٹھی۔ تاہم اس دعوے کی آزادانہ طور پر مکمل تصدیق نہیں ہوسکی۔یہ بیان ایسے وقت میں سامنے آیا ہے جب یمن کے صوبے طائز میں لڑائی میں نمایاں شدت آئی ہے۔ یمن کی بین الاقوامی سطح پر تسلیم شدہ حکومت کے فوجی ترجمان کے مطابق حالیہ دنوں میں حوثیوں کے خلاف متعدد فضائی اور زمینی کارروائیاں کی گئی ہیں،۔
رائٹرز کے مطابق صرف ایک مرحلے میں طائز میں 20 فضائی حملوں کی اطلاع دی گئی۔یمن میں 2022 کی جنگ بندی کے بعد نسبتاً سکون کے ایک عرصے کے باوجود حالیہ ہفتوں میں سعودی عرب کی حمایت یافتہ یمنی فورسز اور ایران نواز حوثیوں کے درمیان کشیدگی دوبارہ بڑھ گئی ہے۔ طائز کی جغرافیائی اہمیت کے باعث وہاں جاری لڑائی کا اثر بحیرہ احمر اور باب المندب کے اہم بحری راستوں پر بھی پڑ سکتا ہے۔
