نئی دہلی۔ افغانستان کے وزیرِ زراعت، آبپاشی و لائیو اسٹاک مولوی عطااللہ عمری کا دورۂ ہندوستان جاری ہے، جہاں انہوں نے مختلف ہندوستانی حکام سے ملاقاتیں کیں اور دونوں ممالک کے درمیان زرعی شعبے سمیت باہمی تعاون کے امور پر تبادلۂ خیال کیا۔ افغان وزیر زراعت، آبپاشی و لائیو اسٹاک مولوی عطااللہ عمری نے اپنے پہلے دورۂ ہندوستان کے دوران نئی دہلی میں پریس کانفرنس کرتے ہوئے کہا کہ ہندوستان آمد پر انہیں ہندوستانی حکام کی جانب سے بھرپور گرمجوشی اور احترام کے ساتھ خوش آمدید کہا گیا۔ مولوی عطااللہ عمری نے کہا کہ یہ ان کا ہندوستان کا پہلا دورہ ہے اور پہلے ہی دن سے ہندوستانی حکومت، ہندوستانی وزیرِ خارجہ اور دیگر حکام کی جانب سے ان کا پرتپاک استقبال کیا گیا، ہندوستان میں قیام کے دوران انہیں اپنائیت کا احساس ہوا اور ایسا محسوس ہوا جیسے وہ اپنے ہی لوگوں کے درمیان موجود ہیں۔ افغان وزیر نے گفتگو کے دوران مزید کہا کہ ہندوستان میں انہیں ایسا محسوس ہوا جیسے یہ ان کا اپنا ملک ہو۔ ایک موقع پر انہوں نے صحافی کو مخاطب کرتے ہوئے کہا کہ جیسا کہ آپ نے ذکر کیا، ہمارا اور آپ کا ڈی این اے ایک ہی ہے۔
دورۂ ہندوستان کے دوران مولوی عطااللہ عمری نے مختلف بھارتی حکام سے ملاقاتیں کیں، جن میں زرعی تعاون، آبپاشی، مویشی پالنے اور دیگر شعبوں میں ممکنہ تعاون کے معاملات پر بات چیت کی گئی، ایسے دورے دونوں ممالک کے درمیان رابطوں کو بڑھانے میں اہم کردار ادا کرتے ہیں۔ واضح رہے کہ افغانستان اور بھارت کے درمیان سفارتی و سیاسی روابط میں گزشتہ عرصہ کے دوران مختلف سطحوں پر سرگرمیاں دیکھی گئی ہیں۔ اس سے قبل بھی افغانستان کے متعدد سیاسی رہنما اور حکومتی شخصیات ہندوستان کے دورے کر چکی ہیں، جہاں دونوں ممالک کے درمیان مختلف امور پر بات چیت ہوتی رہی ہے۔ مولوی عطااللہ عمری کے دورۂ بھارت کو اسی سلسلے کی ایک کڑی قرار دیا جا رہا ہے، جس میں دونوں ممالک کے درمیان مستقبل کے تعاون کے امکانات پر تبادلۂ خیال کیا جا رہا ہے۔
