ہندوستان میں ووٹر لسٹوں کی اسپیشل انٹینسیو ریویژن (ایس آئی آر) کا معاملہ اور ووٹروں کے ناموں کو مبینہ طور پر حذف کرنے کا معاملہ اب بین الاقوامی سطح پر ایک گرما گرم موضوع بن گیا ہے۔ ہندوستانی نژاد امریکی کانگریس کی خاتون رکن پرمیلا جے پال نے تقریباً 13 کروڑ ووٹرز کے نام ڈرافٹ ووٹر لسٹ سے نکالے جانے کی خبروں پر گہری تشویش کا اظہار کیا ہے۔
سوشل میڈیا پلیٹ فارم ایکس پر پوسٹ کرتے ہوئے، ڈیموکریٹک کانگریس وومن جے پال نے لکھا، “میں ہندوستان میں ووٹر لسٹ سے 13 کروڑ ناموں کے ہٹائے جانے پر گہری تشویش میں ہوں۔ میں ہندوستان میں جمہوری نظام کے خلاف کی جا رہی کوششوں کی مخالفت کے لیے چلائی جا رہی عدم تشدد کی تحریکوں کی حمایت کرتی ہوں۔ ایسے وقت میں عدم تشدد کی تحریکیں بہت اہم ہوتی ہیں۔
ہندوستان کی صورتحال کا امریکہ میں صدر ڈونالڈ ٹرمپ کی انتظامیہ کی پالیسیوں سے موازنہ کرتے ہوئے جے پال نے کہا کہ ووٹنگ کے حقوق کو مجروح کرنے کی کوششوں کے ایک جیسے طریقے دونوں ممالک میں نظر آتے ہیں۔ انہوں نے ہندوستان میں مبینہ غیر جمہوری کوششوں کے خلاف احتجاج کرنے والے لوگوں کی عدم تشدد کی تحریکوں کی حمایت کا اظہار کیا۔
تاہم الیکشن کمیشن نے ایسے الزامات کی مسلسل تردید کی ہے۔ کمیشن کے اشتراک کردہ اعداد و شمار کے مطابق، ایس آئی آرعمل کے پہلے اور دوسرے مرحلے کے دوران 13 ریاستوں اور مرکز کے زیر انتظام علاقوں میں تقریباً 72 ملین ناموں کو مسودہ فہرست سے ہٹا دیا گیا تھا۔ کمیشن نے واضح کیا ہے کہ اگر ایس آئی آر کے عمل کے دوران کسی حقیقی ووٹر کا نام نادانستہ طور پر چھوڑ دیا گیا ہے تو وہ دعویٰ اور اعتراض کے عمل اور فارم 6 کے ذریعہ اپنا نام دوبارہ شامل کر سکتے ہیں۔
