ایران کے سپریم لیڈر آیت اللہ علی خامنہ ای کی آخری رسومات کے سلسلے میں عراق کے مقدس شہر کربلا میں زبردست ہجوم اُمڈ آیا۔ سڑکیں لوگوں سے کھچا کھچ بھری ہوئی تھیں۔ ہزاروں، بلکہ لاکھوں افراد صبح ہی سے جلوس جنازہ کے راستوں اور مذہبی مقامات کے اطراف جمع ہونا شروع ہو گئے تھے۔ بہت سے لوگ تو بہتر جگہ حاصل کرنے کے لیے ایک دن پہلے ہی کربلا پہنچ گئے تھے۔
اس سے قبل خامنہ ای کے تابوت کو عراق کے ایک اور مقدس شہر نجف لے جایا گیا، جہاں حضرت امام علیؑ کے روضۂ مبارک پر بڑی تعداد میں لوگ جمع ہوئے۔ لوگوں نے تابوت کو اپنے کندھوں پر اٹھایا۔ ہجوم اس قدر زیادہ تھا کہ تابوت کئی مرتبہ ادھر اُدھر جھولنے لگا۔ متعدد افراد اسے چھونے کی کوشش کر رہے تھے، جس کے باعث دھکا مکی بھی ہوئی۔ بعد ازاں تابوت کو سڑک کے راستے نجف سے کربلا لایا گیا۔ جیسے ہی تابوت شہر میں پہنچا، بڑی تعداد میں لوگ اس کے ساتھ چلنے لگے۔ لوگ ایرانی پرچم لہرا رہے تھے اور اپنے ہاتھوں میں خامنہ ای کی تصاویر اٹھائے ہوئے تھے۔ پورے راستے مذہبی نعرے گونجتے رہے، جبکہ لاؤڈ اسپیکروں کے ذریعے مسلسل اعلانات بھی کیے جاتے رہے۔
بتایا جا رہا ہے کہ شدید گرمی کے پیش نظر مختلف مقامات پر پانی کا چھڑکاؤ کیا گیا۔ آنے والے زائرین کی سہولت کے لیے کھانے پینے کے اسٹال بھی لگائے گئے تاکہ دور دراز سے آنے والے افراد کو کسی دشواری کا سامنا نہ کرنا پڑے۔ سیکورٹی کے لیے بڑی تعداد میں اہلکار تعینات کیے گئے تھے، جبکہ کسی بھی ہنگامی صورت حال سے نمٹنے کے لیے طبی ٹیمیں بھی موجود تھیں۔
قابل ذکر ہے کہ ایران نے ہفتہ سے آیت اللہ علی خامنہ ای کی 6 روزہ آخری رسومات کا آغاز کیا ہے۔ اس دوران جلوس جنازہ ان مذہبی اور تاریخی مقامات سے گزر رہا ہے جو ایران اور شیعہ برادری کے لیے خصوصی اہمیت رکھتے ہیں۔ یہ سفر تہران سے شروع ہو کر ایران کے مقدس شہروں اور پھر عراق کے نجف اور کربلا تک پہنچا۔ اس کے بعد تابوت دوبارہ ایران لے جایا گیا، جہاں جمعرات کو ان کے آبائی شہر مشہد میں سپرد خاک کیا جائے گا۔
