مہاتما گاندھی کے 157ویں یومِ پیدائش اور سابق وزیر اعظم لال بہادر شاستری کے 122ویں یومِ پیدائش کے موقع پر جمعہ کو ملک بھر میں مختلف انداز کے تقاریب منعقد ہو رہے ہیں۔ اس درمیان وزیر اعظم نریندر مودی نے دہلی واقع راج گھاٹ پہنچ کر مہاتما گاندھی کو خراج عقیدت پیش کیا۔ اس کے بعد انھوں نے ’گاندھی سمادھی‘ پر منعقد ’سرو دھرم پرارتھنا سبھا‘ میں بھی حصہ لیا۔ بعد ازاں پی ایم مودی ’وجئے گھاٹ‘ پہنچے، جہاں لال بہادر شاستری کی 122ویں جینتی پر عقیدت کے پھول چڑھائے۔
کانگریس نے بھی 2 اکتوبر کو مہاتما گاندھی کو یاد کرتے ہوئے سوشل میڈیا پلیٹ فارم ’ایکس‘ پر کئی پوسٹس جاری کی ہیں۔ ایک پوسٹ میں مہاتما گاندھی کی تصویر شیئر کرتے ہوئے کانگریس نے لکھا ہے کہ ’’سچائی اور عدم تشدد کے سب سے بڑے خواہاں بابائے قوم مہاتما گاندھی جی کی جینتی پر بھرپور سلام۔‘‘ ایک دیگر پوسٹ میں لکھا گیا ہے ’’یہ ملک گاندھی جی کا ہے، اور ان کے اصولوں سے ہی آگے بڑھے گا۔‘‘ سوشل میڈیا پلیٹ فارم پر کانگریس نے مزید ایک پوسٹ کیا ہے، جس میں لکھا ہے ’’سچائی کے لیے بے خوفی کے ساتھ لڑنے کا نام ہے… گاندھی۔‘‘
دوسری طرف کانگریس نے سابق وزیر اعظم آنجہانی لال بہادر شاستری کو یاد کرتے ہوئے کیے گئے سوشل میڈیا پوسٹ میں لکھا ہے کہ ’’جئے جوان، جئے کسان… ملک کے سابق وزیر اعظم لال بہادر شاستری جی کی جینتی پر سلام پیش ہے۔‘‘ کانگریس نے لال بہادر شاستری سے متعلق مزید ایک پوسٹ میں کیپشن لگایا ہے ’جئے جوان، جئے کسان‘ اور اس کے ساتھ ایک ویڈیو جاری کی ہے، جس میں وہ ایک تقریر کرتے دیکھے جا سکتے ہیں۔ تقریر میں وہ ہندوستان کو ملی آزادی کا ذکر کر رہے ہیں اور یہ عزم بھی ظاہر کر رہے ہیں کہ اسے مضبوطی کے ساتھ اپنے پاس رکھیں گے۔
