نئی دہلی: دہلی پردیش کانگریس کمیٹی کے صدر دیویندر یادو نے کہا ہے کہ ایس آئی آر (اسپیشل انٹینسیو ریویژن) کے نام پر کسی بھی جائز ووٹر کا نام ووٹر لسٹ سے نہیں کٹنے دیا جائے گا۔ انہوں نے کہا کہ کانگریس جمہوریت اور حقِ رائے دہی کے تحفظ کے لیے ہر سطح پر پوری طرح چوکس اور پرعزم ہے۔
دیویندر یادو نے یہ بات راجیو بھون میں بی ایل اے-1 ساتھیوں کے لیے منعقدہ خصوصی تربیتی ورکشاپ سے خطاب کرتے ہوئے کہی۔ ورکشاپ میں ایس آئی آر کے دوران ووٹر لسٹ میں ممکنہ بے ضابطگیوں اور ناموں کی کٹوتی کے خدشات سے نمٹنے کے لیے پارٹی کارکنوں کو عملی تربیت دی گئی۔ پروگرام میں دہلی کانگریس کے انچارج قاضی نظام الدین بھی موجود تھے۔
دیویندر یادو نے کہا کہ کانگریس اس بات کو یقینی بنائے گی کہ ایس آئی آر کے عمل کے نام پر کسی بھی دلت، اقلیتی برادری، بازآبادکاری کالونیوں میں رہنے والے کم آمدنی والے طبقے کے شہری یا کسی بھی جائز ووٹر کا ووٹ نہ کٹے۔ انہوں نے کہا کہ پارٹی کارکن گھر گھر جا کر یہ یقینی بنائیں گے کہ تمام اہل ووٹروں کے نام ووٹر لسٹ میں محفوظ رہیں۔
انہوں نے کہا کہ چاندنی چوک اسمبلی حلقے کے بعض بوتھوں پر بڑی تعداد میں نام کاٹے جانے کے معاملے کو کانگریس زور شور سے اٹھائے گی۔ حالیہ دنوں میں جن لوگوں کو بے گھر کیا گیا ہے، ان کے ووٹ کے حقوق کے معاملے کو بھی ترجیحی بنیاد پر اٹھایا جائے گا۔ ضرورت پڑنے پر پارٹی عدالت کا دروازہ کھٹکھٹانے سے بھی گریز نہیں کرے گی۔
