ریاض ۔ سعودی عرب میں وزارت حج و عمرہ نے حج سیزن 1448ھ کے انتظامات وقت سے پہلے ہی شروع کر دیے ہیں۔ اس سلسلے میں دنیا بھر کے 75 سے زیادہ ملکوں کے حج امور کے دفاتر کے ساتھ ابتدائی میٹنگوں کا سلسلہ شروع کردیا گیا تاکہ آنے والے سیزن کیلئے عملی منصوبوں اور تنظیمی ضروریات پر بات چیت کی جا سکے اور حجاج کرام کی مملکت آمد سے قبل تیاریوں اور باہمی ہم آہنگی کو بہتر بنایا جا سکے۔یہ اجلاس حج سیزن کی ابتدائی منصوبہ بندی کے مراحل کا حصہ ہیں تاکہ وزارت اور حج امور کے دفاتر منظور شدہ ٹائم ٹیبل کے مطابق تیاریوں کا جائزہ لے سکیں۔ طریقہ کار کو واضح بنایا جا سکے اور حجاج کی خدمت پر مامور مختلف اداروں کے درمیان باہمی تعاون کو یقینی بنایا جا سکے۔
ان اجلاسوں میں حج امور کے دفاتر کی جانب سے حج سیزن 1448ھ کیلئے تیار کردہ عملی منصوبوں پر غور کیا جا رہا ہے۔ اس کے ساتھ ساتھ حج امور سے متعلق ہدایات اور ضوابط کا جائزہ بھی لیا جا رہا ہے اور ان دفاتر کی ضروریات پر بحث کی جا رہی ہے۔ان ملاقاتوں میں سیزن کے خصوصی انتظامات اور طریقہ کار سے متعلق سوالات کا جواب بھی دیا جا رہا ہے تاکہ درپیش مسائل کو وقت سے پہلے حل کیا جا سکے اور حج امور کے دفاتر مقررہ مدت کے اندر اپنی تیاریاں مکمل کر سکیں۔اس اقدام کا مقصد وزارتِ حج و عمرہ، حج امور کے دفاتر اور متعلقہ اداروں کے درمیان باہمی تعاون اور ہم آہنگی کو فروغ دینا ہے تاکہ سیزن کیلئے تیاریوں کے معیار کو بہتر بنایا جا سکے اور ضیوف الرحمن کو فراہم کی جانے والی خدمات پر موثر طریقے سے عملدرآمد ہو سکے۔
یہ تمام تیاریاں سعودی قیادت کی ان ہدایات کے تحت کی جا رہی ہیں جن کا مقصد ضیوف الرحمن کی خدمت کیلئے تمام وسائل فراہم کرنا، ان کیلئے مناسکِ حج کی ادائیگی آسان بنانا اور خدمات کے معیار کو اعلیٰ ترین سطح پر لے جانا ہے۔یہ ابتدائی تیاریاں ’’ سعودی ویڑن 2030 ‘‘ اور ’’ ضیوف الرحمن کی خدمت کے پروگرام ‘‘ کے اہداف کا حصہ ہیں۔ ان کا مقصد حج کے نظام میں شامل تمام اداروں کے درمیان باہمی تعاون کو مضبوط بنانا، تیاریوں کی سطح کو بلند کرنا اور حجاج کرام کو فراہم کی جانے والی خدمات کے معیار کو بہتر بنانا ہے۔
