وزیر اعظم نریندر مودی نے اتوار کے روز اپنے مقبول ماہانہ ریڈیو پروگرام ’من کی بات‘ کی 138 ویں قسط میں ملک کے عوام سے خطاب کیا۔ اس دوران انہوں نے ملک کے نوجوانوں کے ذریعہ منشیات کے خلاف لیے گئے عزم کی ستائش کی اور نشے سے پاک نوجوانوں کی مہم سے متعلق تفصیلی گفتگو کی۔ وزیر اعظم مودی نے کہا کہ حال ہی میں ملک کے لاکھوں نوجوانوں نے منشیات کے خلاف ایک بہت اہم عزم لیا ہے۔ نوجوانوں نے خود منشیات سے دور رہنے کا عہد لینے کے ساتھ ہی اس پیغام کو دوسروں تک پہنچانے کی ذمہ داری بھی لی ہے۔
وزیر اعظم مودی نے بتایا کہ یہ سب نشہ سے پاک نوجوان مہم کے تحت ہو رہا ہے۔ یہ مہم 100 ہفتوں تک چلنے والی ہے۔ اس میں ’مائی بھارت‘ کے والنٹئر بڑھ چڑھ کر حصہ لے رہے ہیں۔ اس کے ساتھ ہی این ایس ایس سے وابستہ نوجوان، اسکول، کالج اور یونیورسٹیوں کے طلباء بھی اس مہم سے جڑے ہیں۔ کئی سماجی اور روحانی ادارے بھی اس کا حصہ بنے ہیں۔ انہوں نے کہا کہ گزشتہ کچھ دنوں میں ملک بھر میں ہزاروں عزم کی تقریبات اور بیداری پروگرام منعقد کیے گئے ہیں۔ نوجوان خود اپنی زبان اور اپنے انداز میں منشیات سے نجات کے پیغام کو آگے بڑھا رہے ہیں۔
پی ایم نے کہا کہ میں نے ’من کی بات‘ میں نوجوان ساتھیوں سے اپیل کی تھی کہ وہ اپنی تخلیقی صلاحیت کے ذریعے اس مہم سے جڑیں اور مجھے خوشی ہے کہ ہزاروں نوجوان اس اپیل پر آگے آئے ہیں۔ انہوں نے بتایا کہ ’مائی بھارت‘ پورٹل پر اینتھم، سلوگن رائٹنگ اور نکڑ ناٹک جیسے کئی مقابلے منعقد کیے گئے ہیں۔ سوشل میڈیا پر بھی نوجوان ’نشہ مکت یوا‘ ہیش ٹیگ کے ساتھ اپنا تخلیقی مواد شیئر کر رہے ہیں۔ اس کا مطلب ہے کہ پیغام بھی نوجوانوں کا ہے، ذریعہ بھی نوجوانوں کا ہے اور اسے آگے لے جانے کی توانائی بھی نوجوانوں کی ہی ہے۔
پی ایم مودی نے بتایا کہ آنے والے دنوں میں اس مہم کے تحت ہیلتھ چیک اپ اور دھیان کیمپ جیسی سرگرمیاں بھی منعقد کی جائیں گی۔ تہواروں کا ذکر کرتے ہوئے وزیر اعظم نے ملک کے عوام سے ایک اپیل بھی کی۔ انہوں نے کہا کہ جلد ہی کئی تہوار آنے والے ہیں۔ تہواروں کی خوشیوں کے درمیان ہمیں اپنے آس پاس بھی نظر رکھنی چاہیے۔ اگر کوئی نوجوان کسی غلط عادت کی طرف بڑھ رہا ہے، تو اس سے بات کرنی چاہیے۔ اگر کوئی نشے کی لت سے باہر نکلنے کی کوشش کر رہا ہے، تو اس کا ساتھ دینا چاہیے۔ انہوں نے کہا کہ نشے سے پاک نوجوان اور ترقی یافتہ ہندوستان کے عزم کو ہم سب کو مل کر آگے بڑھانا ہے۔
