الور : مرکزی وزیر بھوپیندر یادو نے اتوار کو مدرز ڈے پر راجستھان کے الور میں خواتین کی سائیکل ریلی کو ہری جھنڈی دکھا کر روانہ کیا۔خواتین کے احترام اور صحت سے متعلق آگاہی کو فروغ دینے کے لیے مدرز ڈے کے موقع پر خواتین کی خصوصی سائیکل ریلی نکالی گئی۔ تقریب میں خواتین اور لڑکیوں کی بڑی تعداد نے جوش و خروش سے شرکت کی۔ اس ریلی کا انعقاد خواتین کو صحت، تندرستی اور سماجی بیداری کے حوالے سے تحریک دینے کے مقصد سے کیا گیا۔
اس موقع پر بھوپیندر یادو نے پروگرام سے خطاب کرتے ہوئے کہا کہ ‘ماتر شکتی’ معاشرے کی سب سے بڑی طاقت ہے نیز خواتین کے احترام اور انہیں بااختیار بنائے بغیر وکست بھارت کا تصور نامکمل ہے ۔ انہوں نے کہا کہ خواتین اس وقت ہر شعبے میں مضبوط کردار ادا کر کے ملک کا نام روشن کر رہی ہیں۔ سائیکل ریلی شہر کی مختلف شاہراہوں سے گزری جہاں لوگوں نے شرکاء کی حوصلہ افزائی کی۔ خواتین نے ہاتھوں میں پیغام لکھی تختیاں لے کر بچیوں کی تعلیم، خواتین کی حفاظت اور صحت سے متعلق آگاہی کا پیغام دیا۔
پروگرام میں مقامی عوامی نمائندوں، سماجی تنظیموں کے ارکان اور شہریوں کی بڑی تعداد نے شرکت کی۔ ریلی کے موقع پر سکیورٹی کے بھی خصوصی انتظامات کیے گئے تھے ۔مدرز ڈے پر منعقد کی گئی اس خصوصی ریلی نے خواتین میں نئی توانائی اور خود اعتمادی کو ابھارا۔ تقریب کے اختتام پر شرکاء کو اعزاز سے بھی نوازا گیا۔
