ابوجا۔ نائیجیریا میں مبینہ خودکش حملہ ہوا ہے۔ مسجد میں دھماکہ اْس وقت ہوا جب نمازیوں کی بڑی تعداد موجود تھی جس کے باعث 5 نمازی شہید ہوگئے جبکہ زخمیوں کی تعداد 35 سے زائد بتا ئی گئی ہے۔ شہید ہونے والے نمازیوں کی تعداد میں اضافہ کا خدشہ ہے۔ تفصیلات کے مطابق شمال مشرقی شہر میدوگوری میں نماز کے دوران ایک مسجد میں دھماکہ ہوا جو مبینہ طور پر خودکش حملہ تھا۔نائیجیریا کی ریاست بورنو کی پولیس کے ترجمان نے بتایا کہ جائے وقوعہ سے خودکش جیکٹ کے مشتبہ ٹکڑے برآمد ہوئے ہیںتاہم اب تک اس بات کی تصدیق نہیں ہوسکی کہ مسجد پر ہونے والے دھماکے کی نوعیت کیا تھی۔ تاحال تحقیقات جاری ہیں۔
ریسکیو ادارے نے زخمیوں کو قریبی ہاسپٹل منتقل کردیا جہاں 7 زخمیوں کی حالت نازک جب کہ 5 کی انتہائی تشویشناک ہے۔ تاحال کسی گروہ نے اس حملے کی ذمہ داری قبول نہیں کی۔ ماضی میں اس نوعیت کے خودکش حملوں کی ذمہ داری شدت پسند بوکو حرام یا اس کا ایک گروپ قبول کرتا آیا ہے۔ریاست کے گورنر باباگانا زولم نے حملے کی شدید مذمت کرتے ہوئے اسے بربریت اور غیر انسانی عمل قرار دیا اور تہواروں کے موقع پر عبادت گاہوں اور عوامی مقامات پر سکیورٹی بڑھانے کی اپیل کی۔
